Riyaziyyatın özünəməxsus gözəlliyi var

Kəmalə ALLAHVERDİYEVA, 129 №-li məktəb

Riyaziyyat fənni üzrə metodbirləşmə rəhbəri

Bu gün Azərbaycan dövlətinin davamlı inkişafı onun təhsil sisteminin keyfiyyətindən asılıdır. Dünyada baş verən qloballaşma və inteqrasiya prosesləri təhsil sistemini daha da aktuallaşdırmış və bu məsələni ölkəmizin inkişafının əsas amilinə çevirmişdir. Dövlət rəhbərinin təhsilin inkişafına xüsusi diqqətinin nəticəsidir ki, bu proses uğurla həyata keçirilir. Hazırda ölkənin iqtisadi həyatında baş verən islahatlar elektron hesablama texnikasının geniş tətbiqinə əsaslanır. Cəmiyyətin tələbləri  riyaziyyatın daha da formalaşmasına şərait yaradır. Riyaziyyatın özünəməxsus gözəlliyi var. Riyaziyyatla məşğul olan hər bir kəsdən işləmək həvəsi, fikri cəmləşdirmək və gərginlik tələb olunur. Bunun üçün müəllimlərimiz öz peşə hazırlıqlarını durmadan artırırlar. Onlar İKT-nin əsaslarına və pedaqoji texnologiyaları mükəmməl mənimsəmək üçün ixtisasartırma kurslarından keçir, riyaziyyatın konstruktiv təlimlə tədrisi metodikasını açmağa çalışır, riyaziyyat fənninin tədrisində bu metodun üstün cəhətlərini öyrədir, yeni biliklər öyrədir, bu biliklərin həyatdakı yerini müəyyənləşdirirlər. Riyaziyyatın dərk edilməsində müəllim əməyinin rolu böyükdür. Tədris etdiyimiz riyaziyyat elminin mühüm rolu ondan ibarətdir ki, o, insanın intelektual və yaradıcılıq qabiliyyətini inkişaf etdirir. Hazırda məktəbimizdə tətbiq olunan yeni proqram riyaziyyatı I sinifdən başlayaraq bütün siniflərdə sıx əlaqəli tədris etməyi nəzərdə tutur.

Məktəbimizin riyaziyyat müəllimləri milli təhsilimizin, eləcə də ölkəmizin dünyanın inkişaf etmiş ölkələrinin səviyyəsinə çıxmasını təmin etmək üçün öz işlərinə məsuliyyətlə yanaşırlar. Məktəb rəhbərliyi bu işlərin uğurla həyata keçirilməsində müəllimlərimizə yardım missiyasını layiqincə yerinə yetirir. Demək olar ki, hər gün dərslər dinlənilir, dərsdən sonra dərsin gedişi təhlil edilir və dəyərli məsləhətlər verilir. Riyaziyyat fənni üzrə metodbirləşmənin iclasında qəbul etdiyimiz qərara əsasən hər gün qarşılıqlı dərsdinləmələr keçirilir, qabaqcıl müəllimlərimizin iş təcrübəsi öyrənilir. Dərslərin gedişi lentə alınır, dərsin gedişini təsvir edən fotolar çəkilir. Bu fotolardan fotostendlər hazırlanıb məktəbin dəhlizlərində divarlardan asılır. Dinlənilmiş dərslərin təhlili zamanı lentə alınmış təsvirlərdən istifadə olunur.

Riyaziyyat dərslərinin uğurlu alınması şagirdlərin baza biliklərindən, müəllimin yeni təlim texnologiyalarından istifadə etmək bacarıqlarından asılıdır. Məktəb rəhbərliyinin tövsiyyələrinə əsasən biz ibtidai siniflərdə riyaziyyatın tədrisini daim izləyirik. İbtidai siniflərdə riyaziyyat fənni yüksək səviyyədə tədris olunur. Bu siniflərdə elektron lövhələrdən istifadə edilir. Lazım olan vaxtlarda riyaziyyat müəllimləri öz məsləhətlərini əsirgəmirlər. Qarşıdan məsuliyyətli günlər - orta məktəb buraxılış imtahanları və ali məktəblərə qəbul imtahanları gəlir. Məktəb rəhbərliyinin təsdiq etdiyi cədvəl əsasında müəllimlərimiz dərsdənkənar məşğələlər keçirirlər. Bu proseslərin məsuliyyətini hiss edən müəllimlərimiz çox həvəslə çalışırlar. Bu məsuliyyətli və şərəfli işdə hamımıza uğurlar arzulayıram. Keçdiyimiz dərslərə və apardığımız məşğələlərə əsaslanaraq qarşıdan gələn imtahanlarda göstəricilərimizin yüksək olacağını söyləyə bilərik.