Hər bir təhsil ocağının siması, mənəvi mühiti orada çalışan müəllimlərin
hansı peşəkarlıq,
Məktəb rəhbərliyinin pedaqoji kollektivin qarşısına
qoyduğu tapşırıqlar, sözsüz ki, təlim keyfiyyətinin, bununla bərabər böyüyən nəslin
mənəvi, əxlaqi tərbiyəsi səviyyəsinin yüksəldilməsidir. Əslində bu vəzifə dövlətin
müəllim qarşısında qoyduğu vəzifədir. 230 nömrəli tam orta məktədə bu vəzifənin
ağırlığını ləyaqətlə daşımaq fəaliyyət, iş prinspinə çevrilmişdir. İştirak
etdiyim dərslərdə də bunu müşahidə etmək mümkün idi.
Mübariz ruhlu gənclər yetişdirmək əzmi
İbtidai sinif müəllifi Sevinc Səfərova təhsil
ocağının qabaqcıl müəllimlərindəndir. Bu il ikinci sinifdə dərs aparan Sevinc
müəllim yetirmələrinin mənəvi tərbiyəsinə önəm verməklə, onların vətən üçün
layiqli vətəndaş kimi yetişmələrini qarşısına başlıca amal kimi qoymuşdur. Elə
şagirdlərinin də simasından bunu oxumaq mümkün idi Sevinc müəllimin. Sevinc müəllim
dərs prosesində informasiya – kommunikasiya texnologiyalarının tətbiqinə
üztünlük verir. İKT-ni tədrisə tətbiq etməklə maraqlı təlim mühiti yaratmağa,
şagirdlərinin diqqətini cəlb etməyə, onların tədrisə marağını artırmağa nail
olur. Sevinc Səfərovanın dərs ilinin sonunda təşkil etdiyi “Hər birimiz bir çiçək”
adlı kompozisiyada da şagirdləri maraqlı çıxışları ilə məktəbin pedaqoji
kollektivinin və şagirdlərin rəğbətini qazandılar. Onlar məktəbin səhnəsində həvalə
olunmuş rolları məharətlə ifa etməklə alqışlarla qarşılandılar. Qeyd edim ki,
Sevinc Səfərova ibtidai siniflər üzrə fənn kafedrasının rəhbəridir. 
Əfsanə Rəhimova ibtidai sinif müəllimidir. Bu il
4-cülərini yola salan Əfsanə müəllim riyaziyyat dərsində sinfi “Lütfüzadə”,
“Tusi”, “Arximed”, “Pifaqor” olmaqla dörd qrupa bölmüşdü. O, qeyd edir ki,
mövzunun verdiyi imkanlardan istifadə etməklə fəal təlim texnologiyalarını tətbiq
etmək fəaliyyətinin əsas istiqamətini təşkil
edir. Bu, hiss olunurdu. Əfsanə müəllim sinfin bütün şagirdlərini qoyulmuş sual
ətrafında fəal çalışmağa, öz fikirlərini sərbəst ifadə etməyə, məntiqli
cavablar verməyə çalışır və buna nail olurdular.
Günel Hacızadənin ikincilərlə apardığı “Həyat
bilgisi” fənnindən “Hüquqlarımızı bilək” mövzusunda dərs maraqlı məqamlarla
yadda qaldı. Şagirdlər hüquqlarını kimin daha yaxşı bilməsi uğrunda sanki
yarışa girmişdilər. Müəllim mövzunun imkanlarından istifadə etməklə irəli
sürdüyü suallarda uşaqların öz hüquqlarını onlara aşılamaqla bərabər
başqalarının hüquqlarını da qorumağı, başqalarının hüquqlarına hörmətlə
yanaşmağı, xeyirxah olmağı tövsiyyə edirdi. Şagirdlər fikirlərini sərbəst ifadə
edir, problemin aradan qaldırılması istiqamətində müstəqil fikir irəli sürürdülər.
Bunun nəticəsi olaraq sonda sinfin kollektiv işinin bəhrəsi kimi “Hüquqlarımızı
tanıyaq” adlı divar qəzeti meydana gətirdilər.
Nigar Bədəlova 3-cü “d” sinfində riyaziyyat dərsində
sagirdləri sərbəst olaraq məsələlər qurmağa istiqamətləndirmişdi. Şagirdlər sərbəst
məsələlər qurur, müstəqil olaraq məntiqli riyazi fikirlər irəli sürürdülər. Müəllim
şagirdləri yazı lövhəsinə dəvət etdi. Hər qrupdan bir nəfərin dəvət olunduğu
yazı lövhəsi qarşısında yarış təşkil olundu. Hər kəs öz biliyini nümayiş etdirməyə,
qələbə əldə etməyə çalışırdı. Nigar Bədəlova da məktəbin mübariz ruhlu gənclər
yetişdirmək əzmində olan müəllimlərindəndir.
Mehdi Talıbov məktəbin qabaqcıl riyaziyyat müəllimlərindəndir.
Fəal təlim texnologiyalarını tədris prosesinə məharətlə tətbiq edən Mehdi müəllimin
ənənə ilə müasirliyin vəhdətində qurduğu dərslər maraqlı cəhətləri ilə seçilir.
O, hər bir şagirdinə fərdi yanaşmaqla, mənimsəməni yüksəltməyə, riyazi misal və
məsələləri müstəqi olaraq həll etmələrinə nail olur.
Yaradıcılıq həvəsi ilə
Məktəbin ingilis dili müəllimi Qıztamam Fərzəliyeva 5 “b” sinfində şagirdlərin xarici dili daha dərindən mənimsəmələri
üçün dərsi dialoq üsulundan istifadə etməklə qurmuşdu. Şagirdlər bir-biriləri
ilə fəal dialoq əsnasında mazakirə aparır, fikirlərini xarici dildə bir-birilərinə
çatdırır, qoyulmuş sualları izah edirdilər. Qıztamam müəllim də İKT-nin
imkanlarından istifadə edən fəal müəllimlərdəndir. O, şagirdlərinin yaradıcı
imkanlarını aşkara çıxarmaq, onları realizə etmək üçün söz ehtiyatlarını
artırmağa, sərbəst mətn qurmağa, bununla da dərsdə sərbəst mühakimələr irəli
sürmələrinə nail olmuşdu. Qıztamam müəllim dərs prosesində texniki, əyani vəsaitlərdən,
sxemlərdən tez-tez istifadə edir. Şagirdlərinin yaradıcılıq bacarıqlarını
inkişaf etdirmək üçün onlara qabaqcadan mövzu haqqında məlumat verir. Şagirdlər
müxtəlif mənbələrdən mövzunu araşdırıb müvafiq material təqdim edirlər. Məsələn,
mövzu kitabxanadırsa, onlar dünyanın müxtəlif kitabxanaları haqqında məlumat
toplayıb gətirirlər. Bu da öz növbəsində şagirdləri gələcək daha böyük yaradıcı
işlərə həvəsləndirir.
Məktəbin informatika müəllimi Tünzalə Əmirova 5 “c”
sinfi ilə dərsi informatika kabinetində aparırdı. Ümumiyyətlə, məktəbdə
informatika dərsləri əsasən bu kabinetdə aparılır. İnternet şəbəkəsi, lazımı səviyyədə
İKT avadanlıqları ilə təchiz olunmuş bu
kabinetdə dərsi ən müasir səviyyədə həyata keçirmək mümkündür. Elə Tünzalə
Əmirovanın dərsi də bu baxımdan xarakterik idi. Müşahidələrim əsasında belə qənaətə
gəldim ki, 5-cilər İKT – dən istifadə imkanlarına öz yaşları səviyyəsində yiyələniblər.
Ümumilikdə isə məktəbdə şagirlərin informasiya-kommunikasiya
texnologiyalarından istifadə imkanlarını məqbul hesab etmək olar. Təbii ki,
İKT-nin imkanlarından istifadə etməklə qurulan dərslərdə təlim prosesinin
keyfiyyətinin yüksəlməsindən danışmaq mümkündür. Tünzalə müəllim dərs prosesində
beyin həmləsi, kublaşma və klaster üsulundan istifadə etməklə dərsin səmərəsini
artırmağa çalışır.
Məktəbin digər ingilis dili müəllimi Firuzə İsayeva
5 “b” sinfində apardığı dərsdə sinfi
qruplara bölmüşdü. Müəllim bütün dərs boyu ingilis dilində danışdı. Buna rəğmən
şagirdlərin də ingilis dilində danışmaları sinifdə maraqlı bir dialoq mühiti
yaratmışdı. Yazı lövhəsi qarşısında şagirdlərlə ingilis dilində sorğu-sual
aparıldı. Şagirdlər müəllimin ingilis dilində ünvanladığı sulları ingilis
dilində cavablandırdılar. Sonra qruplar verilmiş tapşırıqlar üzərində işlədilər.
Təqdimatlar da təbii ki, ingilis dilində aparıldı. Ümumiyyətlə, müşahidələrimə əsasən
deyə bilərəm ki, məktəbdə ingilis dilinin tədrisinə xüsusi diqqətlə yanaşılır.
Şagirdlərin ingilis dilində buraxdıqları divar qəzetləri, hazırladıqları
referatlar, ingilis dilində tədbirlər, təqdimatlar bu dilə marağı təmin etməklə
yanaşı, şagirdlərin ali məktəblərə qəbulda ingilis dilindən yüksək nəticələr əldə
etmələrinə də yol açır.
Sinifdənxaric tədbirlər təlim keyfiyyətini yüksəldən
vasitələrdəndir
Mehriban Qafarova 8 “b” sinfində apardığı biologiya dərsində şagirdərin sanki ətraf
aləmlə təmasını qurmağa nail olmuşdu. O, da dərslərini fəal təlim
texnologiyaları əsasında qurur. İKT-dən istifadə etməklə şagirdlərini
biologiyanın möcüzəli aləminə səyahətə çıxarır. Məktəbin əyani vəsaitlərlə zəngin
olan biologiya kabinetində də tədrisin əyani
vəsaitlərlə qurulmasına imkan verən əyani vəsaitlər vardır. Mehriban müəllim təşkil
etdiyi sinifdənxaric tədbirlərdə də şagirdlərin biologiyaya olan marağını təmin
etməyə nail olur.
Tarix müəllimi Madlena Mirzaqayeva 9 “c” sinfində dərs
prosesini şagirdlərin təlimə marağını təmin edəcək səviyyədə qurmuşdu. Dərs boyunca şagirdlər mövzuya
uyğun olaraq xəritə üzərində işlədilər. Qruplarla iş əməkdaşlıq üzərində quruldu.
Şagirdlərə Azərbaycan tarixinin ayrı-ayrı məqamlarını böyük məharətlə aşılamaq
imkanına, intellektual səviyyəsinə malik olan Madlena müəllim şagirdlərinin əsl
ləyaqətli vətəndaşlıq kimi yetişməsini qarşısına məqsəd kimi qoyan müəllimlərdəndir.
Məktəbin riyaziyyat müəllimi Siyavuş Babayev 8-ci
sinifdə apardığı “Birdəyişənli bərabərsizliklərin
həlli” mövzusunda dərsi fəal təlim texnologiyaları əsasında qurmuşdu. Sinif
qruplara bölünmüşdü. Şagirdlər yazı lövhəsi qarşısına qrup halında çıxıb
qoyulan sulları cavablandırırdılar. Müəllim bununla qrup üzvlərinin hər birini
fəallıq göstərməyə, əməkdaşlıq şəraitində işləməyə cəlb edirdi.
Ədəbiyyat müəllimi Əzəmət Quliyeva 9-cu sinifdə
apardığı dərsdə görkəmli Azərbaycan şairi Cabir Növruzun “Sağlığında qiymət
verin insanlara” şeirini təhlilə cəlb etmişdi. Şagirdlər şeiri hamılıqla mənimsəmişdilər.
Onlar qrup halında lövhə qarşısına çıxır, şeirin ayrı-ayrı bəndlərini əzbərdən
söyləyirdilər. Şagirdlər şeiri söylədikdən sonra yerdən onlara mövzu ətrafında
suallar ünvanlayırdılar. Ümumiyyətlə dərs qruplarla iş üzərində qurulmuşdu.
Şagirdlər qrup tapşırıqlarını Cabir Novruzun “Bulaq suyu dağ havası”, “Ey həyat
sən nə qəribsən” mahnısının sədaları altında icra edirdilər. Bu da onlara əlavə
stimul verirdi. Müəllimin hər bir şagirdə fərdi yanaşması da diqqəti cəlb
edirdi. Şeirin təhlili zamanı da şagirdlər maraqlı fikirlər irəli sürürdülər.
Nağılları xatırladan dərs
Vəfa Məmmədovanın “Nağıllar” mövzusunda apardığı dərs
sinifdə elə nağıllar aləminə bənzər bir mühit yaratmışdı. Müəllim şagirdlərə “Nənəm
nağıl danışır” şeirini oxudu. Müəllim şeiri oxuduqca, onu həm də təhlilə cəlb
edir, nağıl qəhrəmanlarının mənəvi aləmini açır, şeirin müəllifi Nəbi Xəzri
haqqında yeri gəldikcə məlumat verirdi. Vəfa müəllim sinfi “Himn”, “Gerb”,
“Ulduz” adlı qruplara bölmüşdü. Qruplar tapşırıq əsasında nağıl qurdular.
“Bayraq” qrupunun təqdimatı daha maraqlılığı ilə diqqəti cəlb etdi.
Ədəbiyyat müəllimi Səlmi İsayevanın 10-cu sinifdə
apardığı “19-cu əsr Azərbaycan ədəbiyyatı ikinci mərhələ” mövzusu sinifdə sözün
həqiqi mənasında canlanma yaratmışdı. Sinif
“Bakıxanov”, “Natavan”, “Vəzirov” qruplarına bölünmüşdü. Qrupların adı
da öz növbəsində mövzunun 19-cu əsrə aid olduğunu söyləməyə imkan verirdi. Müəllim
qrupların cavabları əsasında sinfə suallar ünvanlayırdı: İctimai satira ilə
inqlabi satiranın fərqi nədir? İctimai satiranın banisi kimdir? İnqlabı
satiranın banisi kimdir? Lirik poema ilə epik poemanın fərqi nədir? İsmayıl bəy
Qutqaşenli kimdi? və s.
Səlmi müəllim dərsin mövzusunu elan etdi. Bu, Qasım
bəy Zakir mövzusu idi. Müəllim məlumat verdi ki, Qasım bəy Zakir Cavanşirlər nəslinin
nümayəndəsidir. Zakirin ulu babasının qardaşı Pənahəli xan olub. Səlmi müəllim
danışdıqca Zakirin şəxsiyyəti, dövrü, ictimai fəaliyyəti şagirdlərin gözləri
qarşısında canlanırdı. Məlum olurdu ki, Mirzə Fətəli Axundov, Abbasqulu ağa
Bakıxanov, İsmayıl bəy Qutqaşenli, Arbeliani Zakirinin yaxın dostları olub.
Qasım bəy Zakir öz yaradıcılığı etibarilə zamanından bu yana qəlbləri fəth etməkdədir.
Məktəbin Çağırışa Qədərki Hərbi Hazırlıq müəllimi
Alim Mirxasov dərsə tağım komandirinin
tağımı əmrlə farağat vəziyyətinə gətirməsi ilə başlayır. Tağım komandiri sinfin
vəziyyəti barədə məruzə etdikdən sonra dərs başlayır. Öncə keçmiş mövzu
sual-cavab edilir. Çətinliklər varsa aradan qaldırılır. Ötən mövzunun tam mənimsənilməsinə
çalışılır. Alim Mirxasov nəzəri dərslərdə təbii olaraq nəzəri məlumatların daha
çox ötürülməsinə çalışır. Şagirdlərin hərbi-texniki biliklərə yiyələnməsi,
silahdan istifadə imkanlarına malik olması Alim müəllimin başlıca məqsədidir.
Musuqi müəllimi Validə Cavadova musiqinin şagirdlərin
dünyagörüşünün, mənəvi aləminin formalaşmasında rolunu yüksək qiymətləndirərək,
dərsdə onların daha çox musiqi ilə təmasda olmasına çalışır. Müzakirələr, təhlillər
əsasında qoyulmuş sualların cavablandırılması dərsin əsas qayəsini təşkil edir.
Validə müəllim müəyyən hallarda dərsi təbiətin qoynunda, açıq havada təşkil etməklə
həm şagirdlərin musiqini qavrama qabiliyyətini, həm də musiqiyə olan
maraqlarını təmin etməyə nail olur.
Şagirdlərin layihələri diqqət cəlb edir
Məktəbin informatika müəllimi Amalya Mustafayeva dərslərini
informasiya-kommunikasiya texnologiyalarından istifadə etməklə qurur. Bununla
da o, dərslərinin bir-birindən fərqli keçməsinə nail olur. Kompüter otağında
yerləşdirilmiş elektron lövhə, proyektor dərs prosesndə müvafiq əməliyyatların
yerinə yetirilməsində onların köməyinə çatır. Amalya müəllimin şagirdləri
kompüterdən sərbəst istifadə edir, verilən tapşırıqları internetdən əldə edib təqdimat
hazırlayır, maraqlı kiçik layihələrlə çıxış edirlər.
Rus dili müəllimi Mehriban Nəcəfova da dərslərin
şagirdlərin yaş səviyyəsinə uyğun maraqlı motivasiya ilə başlamasına nail olur.
O, şagirdlərin motivasiya ətrafında öz fiirlərini, fərziyyələrini irəli sürmələrinə
çalışır. Bu fikir və fərziyyələrdən istifadə edərək şagirdlərini qoyulan
problemlərin həllinə yönəldir. Mehiban Nəcəfova dərs prosesində elektron
materiallardan, vizual görüntülərdən istifadəyə üstünlük verir. Bu da öz növbəsində
mövzunun şagirdlər tərəfindən daha mükəmməl mənimsənilməsinə imkan yaradır.
Milli-mənəvi dəyərlər ruhunda tərbiyə
Məktəbin idman müəllimi Əsayə Ağayev 5-7-ci siniflərdə
dərslərini kurikulum proqramlarının əsasında aparır. Onun dərslərində şagirdlərin
idmana böyük maraq göstərdiklərinin şahidi olmaq mümkündür. Əsayə müəllim idman
dərsini şagirdlərinin ən sevimli fənninə çevirə bilib. Bunun nəticəsidir ki,
şagirdlərin idman nailiyyətləri müntəzəm olaraq artır.
Məktəbin digər idman müəllimi Səfurə Ağayeva da
idman dərsinin şagirdlər tərəfindən maraqla gözlənilən dərslər sırasına daxil
olmasına nail olub. Məktəbdə dərs ilinin əvvəlində şagirdlər arasında normativlər
keçirilir. Bunun əsasında rayon spartakiadasında iştirak etmək üçün şagirdlər
seçilir. Şagirdlər bu yarışlarda əsasən qalib adlarına layiq görülürlər. Məktəbin
məzunları arasında İdman Akademiyasında təhsil alanlar da az deyil.
Kimya müəllimi Dilarə Məmmədova da dərs prosesini
müasir tələblər səviyyəsində quran, o cümlədən İnformasiya-kommunikasiya
texnologiyalarından, fəal təlimin üstünlüklərindən səmərəli istifadə edən müəllimlərdəndir.
O, dərs prosesində şagirdlərinin bilik və bacarıqlarının inkişafına, milli-mənəvi
dəyərlərimizin mənimsənilməsinə çalışmaqla, təlim prosesini şagirdlərin arzu və
istəkləri səviyyəsində reallaşdırmağa nail olur. O, şagirdlərinin müstəqil
araşdırmalar aparması, sərbəst öyrənmə bacarıqlarının formalaşdırılması, mütaliə
vərdişlərinin inkişaf etdirilməsi məqsədilə müxtlif istiqamətlərdə iş aparır. Fəaliyyətini
yalnız sinif daxilində məhdudlaşdırmır. Sinifdənxaric tədbirlərlə də şagirdlərinin
inkişafına nail olur. Bu məqsədlə bilik yarışları, fənn aylıqları çərçivəsində
müxtəlif mövzularda mədəni-kütləvi tədbirlər həyata keçirir.
Məktəbin rus bölməsində ibtidai sinif müəllimi Kəmalə
Sultanova tədqiqat sualı ətrafında şagirdlərin səmərəli işləməsi üçün qrup şəklində çalışmalarına daha çox şərait yaradır. Bu
zaman şagirdlərin əməkdaşlıq şəraitində işləmələrinə, fikir mübadiləsi aparıb nəticələr
əldə etmələrinə nail olmağa çalışır.
İbtidai sinif müəllimi Dürdanə Əhmədova da dərsi
motivasiya ilə başladı. Şagirdləri problemin həllinə yönəltmək üçün düşündürücü
suallardan istifadə etdi. Dərs prosesində şagirdlər arasında müzakirələrin
aparılmasına şərait yaratdı. Kiçik esseler yazmaq, obrazları təsvir etmək,
mövzuya uyğun krossvord qurmaqla şagirdlərinin təfəkkürünün inkişaf etdirilməsinə
çalışdı. Qiymətləndirməni dərs prosesi boyunca apardı.
Coğrafiya müəllimi Ellada Əhmədova da dərs
prosesində İnformasiya – Kommunikasiya texnologiyalarından səmərəli istifadə
edir. O, dərsdə meydana qoyduğu problemi şagirdlərin birlikdə həll etmələrinə
çalışmaqla sinifdə əməkdaşlıq mühiti yaratmağa çalışır. Şagirdlər sinifdə tədqiqat
aparır, xəritələri googlemapservislərlə öyrənirlər. Dürdanə müəllim mövzunun
verdiyi imkanlardan istifadə etməklə rollu oyunlardan bəhrələnir, şagirdlərini
praktik fəaliyyətə öyrədir.
Rus dili müəllimi Sevil Həsənovanın şagirdləri ilə
birgə devizləri var: “Geriyə yol yoxdur. Yerində də saymaq olmaz. Hamı birlikdə
irəliyə doğru!” Bu deviz Sevil müəllimin şagirdləri üçün əslində motivasiyadır.
Onun dərsləri əsas etibarilə şagirdlərinin məntiqi təfəkkürünün, yaradıcılıq
imkanlarının inkişaf etdirilməsinə yönəlib. O, buna nail olmaq üçün müxtəlif
innovativ yollardan istifadə edir. Dərs prosesində irəli sürülən problemin həlli
birlikdə müzakirə olunur. Nəticələr təhlil edilir. Əməkdaşlıq şəraitində
qurulan dərs, əldə olunan nəticələr şagirdlər tərəfindən maraqla qarşılanır,
onların təlimə marağını artırır.
Rus bölməsinin ibtidai sinif müəllimi Təranə Səmədova
dərslərə Azərbaycanın Dövlət Himninin ifası ilə başlayır. Dərs prosesində
qruplarla işə daha çox əhəmiyyət verən Təranə müəllim, ümimilikdə fəal təlim
metodlarından səmərəli şəkildə istifadə edir. Şagirdləri yaradıcı işləməyə həvəsləndirməklə,
onların maraqlı ideyalarla çıxış etməsinə, təkliflər irəli sürməsinə şərait
yaradır. Yaradıcı fəaliyyət, şübhəsiz ki, təlim keyfiyyətini artıran amillərdəndir.
Tarix müəllimi Qərənfil Əsədova dərs prosesində,
xüsusilə motivasiya mərhələsində cizgi filmlərindən, sənədli və bədii filmlərdən
istifadə edir. Bu da dərsin gələcək mərhələlərinin daha effektli həyata
keçirilməsi üçün təkan rolunu oynayır. Şagirdləri tədqiqatçılığa həvəsləndirmək,
bu istiqamətdə onlara stimul vermək Qərənfil müəllimin əsas iş prinsiplərindəndir.
Kimya müəllimi Bahar Cabbarova da məktəbin ümumi iş
ahənginə müvafiq olaraq şagirdlərinin vətənpərvərlik ruhunda tərbiyəsini
qarşısına əsas məqsəd kimi qoyub. O, dərs prosesində, eləcə də dərsdənkənar tədbirlərdə
şagirdlərinin bilik, bacarıq və vərdişlərinin inkişafına, onların milli-mənəvi
dəyərlərə sahib olmalarına nail olmaq üçün müxtəlif üsul və vasitələrdən
istifadə edir. O, dərsin ilkin mərhələsində şagirdlərin düşünmə qabiliyyətlərini
istiqamətləndirmək üçün maraqlı motivasiyalar qurur. Şagirdlərinin tədqiqat
sualları üzərində birgə düşünməsinə, işləməsinə nail olur.
İbtidai sinif müəllimi Nəcibə Əliyeva da məktəbin
yaradıcı müəllimlərindəndir. Fəal təlim metodlarından yaradıcılıqla istifadə edən
Nəcibə müəllim bununla şagirdlərin təlimə marağını təmin edir. Sinifdə maraqlı
öyrənmə mühiti yaradır. Esselərin yazılması, krossvordların tərtib olunması, bədii
əsərlərdəki obrazlara münasibət bildirilməsi Nəcibə müəllimin işində əsas
istiqamət təşkil edir.
Böyükağa MİKAYILLI
No comments:
Post a Comment