Köçkün məktəblərimiz ^ Rubrikamızın qonağı Zəngilan rayon 26 nömrəli tam orta məktəbdir

YAXŞILAR CƏRGƏSİNDƏ

Təhsil Şurası erməni silahlı qüvvələrinin işğalından sonra köçkünlük həyatı yaşamağa məcbur olan təhsil ocaqlarımızla tanışlığı davam etdirir. Rubrukamızın bu dəfəki qonağı Zəngilan rayon 26 nömrəli tam orta məktəbdir.

Köçkünlüyün ilk illəribdən – 1993-cü ildən Bakı şəhərində fəaliyyət göstərən bu təhsil ocağı şəhərdəki fəaliyyətinin ilk illərindən ənənələrinə sadiq qalaraq böyük uğurlara imza ata bilib. Məktəbin direktoru Süleyman Abdullayevlə bir neçə il əvvəlki söhbətimizdə də, bu günlərdə apardığımız müsahibədə də təhsil ocağının nailiyyətlərinin ilbəil artdığını dilə gətirdi. Söylədi ki, bu gün Zəngilan müəllimlərinin çiyinlərində daha ağır yük var. Onlar öz işlərini köçkünlüyün ağır maddi-mənəvi yükü altında həyata keçirirlər. Və nə yaxşı ki, bu işin öhdəsindən şərəflə gəlməyi bacarırlar.

Süleyman Abdullayev məktəbin nailiyyətlərindən böyük fərəh hissi ilə danışır və öz nailiyyətlərini Azərbaycan təhsilinin nailiyyəti hesab etməklə, təhsilimizdə son dövrlər həyata keçirilməkdə olan dəyişikliklərin onların da fəaliyyətinə müsbət təsir etdiyini vurğulayır. Qeyd edir ki, köçkünlüyün ilk illərində dövlətimiz tərəfindən inşa edilərək 26 nömrəli məktəbin pedaqoji kollektivinə verilən

məktəbin binası zaman-zaman dövrün tələblərinə uyğunlaşdırılaraq, istilik sistemi, əyani vəsaitlər, informasiya-kommunikasiya texnologiyaları ilə təchiz edilib. Şübhəsiz ki, təlimdə əldə edilən yüksək nəticələr də məhz bu diqqət və qayğının sayəsində mümkün olmuşdur.

Süleyman müəllimin tövsiyəsi ilə məktəblə tanışlığı çağırışaqədərki hərbi hazırlıq kabineti ilə başladıq.  Keçmiş döyüşçü, hərbi rəhbər Sabir Hacıyevin gərgin əməyi nəticəsində yaradılan kabineti əsl “Vətənpərvərlik guşəsi” də adlandırmaq olar. Hərbi kabinet Qarabağ müharibəsinin, ermənilər tərəfindən Azərbaycanlılara qarşı törədilmiş soyqırımlarının, xalqımızın qəhrəman oğullarının düşmənə qarşı döyüş şücaətlərinin, şanlı hərb tariximizin ayrı-ayrı məqamlarının, hərbçi tarixi şəxsiyyətlərimizin həyatını özündə əks etdirmək baxımından mühüm əhəməmiyyətə malikdir. Kabinetlə tanış olduqca düşünürdüm ki, bu məktəbin bu sahədə olan təcrübəsinin respublika məktəbləri arasında yayılması məqsədəuyğun olardı. Biz də öz növbəmizdə bu mövzuya qayıdacağıq.

Ümumiyyətlə, 26 nömrəli tam orta məktəbdə müəllimlərin fəaliyyətində diqqətçəkən məqamlar çoxdur.  Süleyman Abdullayev məktəbin qabaqcıl müəllimlərindən kimya müəllimi Reyhan Əmiraslanovanın (Reyhan Əmiraslanova həm də məktəbin direktor müavinidir), ingilis dili müəllimləri Səyyarə Salahovanın, Afaq Əzizovanın, dil-ədəbiyyat müəllimlərindən Aidə Baxşəliyevanın, Arzu Rəhimlinin, riyaziyyat müəllimləri Əfşan Bəşirovanın, Zahid Hüseynovun, biologiya müəllimi Hafizə Talıbovanın, bədən tərbiyəsi və idman müəllimi Teymur Namazəliyevin, informatika müəllimi Azadə Abbasovanın, informasiya-kommunikasiya texnologiyaları üzrə laborant Laləzar Aslanovanın adlarını çəkməklə məktəbdə təlim-tərbiyə işinin keyfiyyətinin yüksəldilməsində bu müəllimlərin xüsusi əməyini vurğulayır. Elə Süleyman müəllimin adlarını çəkdiyi müəllimlərin bir qisminin dərsində olarkən də şahidi oldum ki, məktəb, ümumiyyətlə, öz iş prinsiplərini yeni strategiyanın tələbləri, yeniliklərin tətbiqi istiqamətində qurur. Dilarə Abbasovanın, Aytəkin Şıxıyevanın, Afət Həsənovanın, Şəhla Hacıyevanın, Günel Muradovanın, Aidə Hacıyevanın, Hafizə Talıbovanın hər birinin dərsində müasir yanaşmaları müşahidə etmək mümkün idi. Süleyman Abdullayev qeyd edir ki, məktəbin yüksək intellektual hazırlığa malik pedaqoji kollektivinin səyi, nizam – intizamın sayəsində 26 nömrəli tam orta məktəb ali məktəblərə qəbulun nəticələrinə görə həmişə seçilənlər sirasında olur. 2012-2013-cü dərs ilində məhz əldə olunan yüksək göstəriciyə görə məktəb Tələbə Qəbulu üzrə Dövlət Komissiyasının müəyyənləşdirdiyi reytinq cədvəlində respublika üzrə beşinci sırada yer tutub. Ötən dərs ilində isə məktəbin 29 məzunundan 20 nəfəri tələbə adını qazanıb. Sevindirici haldır ki, məzunların arasında Milli Aviasiya Akademiyası, Bakı Dövlət Universiteti, Dillər Universiteti, Azərbaycan Dövlət İqtisad Universiteti kimi nüfuzlu ali təhsil ocaqlarını, Ali hərbi məktəbləri seçənlər az deyil.

Süleyman Abdullayevin sözlərinə görə, məktəbdə gənclərin vətənpərvərlik ruhunda tərbiyə olunması pedaqoji kollektivin qarşısında bir nömrəli vəzifə kimi dayanır. Torpaqlarımızın işğal tarixlərinə həsr olunmuş tədbirlər, xalqımıza qarşı törədilmiş soyqırımların anım günü yüksək səviyyədə təşkil olunmaqla şagirdlərin yaddışana həkk olunur. Şagirdlərə öz ata-baba torpaqları olan Zəngilanın tarixini, mədəniyyətini, görkəmli şəxsiyyətlərini, adət-ənənələrini tanıtmaq üçün məktəbin xüsusi tədbirlər planı var. Bu plan hər bir müəllimin fəaliyyətində əks olunmaqla, məktəbin ümumilikdə iş ahənginin tənzimlənməsinə təsir göstərir.

Qeyd edim ki, məktəbin idmançıları – xüsusən futbolçuları Sərxan Əhmədov, Anar Həsənov müxtəlif yarışlarda iştirak etməklə məktəbin adına şərəf gətirlər. Onlarla görüşə bilmədik, amma  “Səbael” futbol komandasının oyunçusu Aynur Zeynalova ilə isə görüşmək imkanı əldə etdik. Gənc futbolçunun yüksək əhval ruhiyyəsi bizə də sirayət etdi. Məktəbi elə bu əhvalla, eləcə də pedaqoji kollektivə gələcək uğurlar diləyi ilə tərk etdik.

İnanırıq ki, bu gün köçkünlük şəraitində yetişən, formalaşan Zəngilanlı gənclər gələcək-düşmən işğalından azad olacaq Zəngilanın qurucuları olacaqlar...

Böyükağa MİKAYILLI