144 nömrəli tam orta məktəbdə 20 yanvara həsr olunmuş tədbir

16 yanvar 2015-ci il tarixdə Bakıdakı 144 nömrəli tam orta məktəbdə 20 yanvar

şəhidlərinin xatirəsinə həsr olunmuş ədəbi-bədii kompozisiya keçirildi. Tədbirdə Azərbaycan Təhsil Şurasının sədri professor Əjdər Ağayev, “Təhsil və zaman” qəzetinin redaktoru Böyükağa Mikayıllı, məktəbin pedaqoji kollektivi, şəhid ailələri, şagirdlər iştirak edirdilər.

20 yanvar şəhidlərinin xatirəsinə matəm ab-havasına bürünmüş məktəbin akt zalında keçirilən tədbir Azərbaycan Respublikasının Dövlət Himni il açıldı, şəhidlərin ruhu bir dəqiqəlik sükutla yad edildi. Şagirdlərin ifasında vətənpərvərlik ruhlu mahnılar  oxundu, şeirlər söylənildi. Bir-birini əvəz edən kompozisiyalar şəhidlərin ruhuna ağı kimi səslənir, vətənpərvərlik hissləri aşılayırdı.

Tədbirdə çıxış edən professor Əjdər Ağayev 20 yanvar hadisəsini Azərbaycan xalqının azadlıq mücadiləsində mühüm mərhələ adlandırdı. Qeyd etdi ki, Sovet imperiyası həmin gün Azərbaycan xalqının azadlıq uğrunda mübarizə ruhunu sarsıtmağa çalışsa da, buna nail ola bilmədi. Əksinə, Vətəninin azadlığı uğrunda mübarizəyə qalxmış xalq son ana qədər mübarizə əzmi nümayiş etdirərək, öz istiqlaliyyətinə qovuşdu. Əjdər Ağayev vurğuladı ki, 20 yanvar şəhidləri arasında tələbələr, müəllimlər, şagirdlər də var idi. Xalqımız 20 yanvar şəhidlərinin xatirəsini hər zaman əziz tutur. Ə.Ağayev 144 nömrəli məktəbdə şəhidlərin xatirəsinə həsr olunmuş bu tədbirin yüksək səviyyədə təşkil olunduğundan, şagirdlərin vətənpərvərlik ruhlu mahnıları məharətlə ifa etdiklərindən də məmnunluq duyduğunu ifadə etdi.

Tədbirdə çıxış edən 144 nömrəli tam orta məktəbin direktoru Həcər Mahmudova diqqətə çatdırdı ki, rəhbərlik etdiyi təhsil ocağının məzunu İsrafil Haşımov 20 yanvar 1990-cı ildə şəhid olmuşdur. Məktəb Qarabağ uğrunda döyüşlərdə şəhid olmuş məzunu Namiq Babayevin adını daşıyır. O, vurğuladı ki, bu gün 144 nömrəli tam orta məktəbdə gənclərin vətənpərvərlik ruhunda tərbiyə olunması istiqamətində sistemli iş aparılır. Bu iş pedaqoji kollektivin bir nömrəli vəzifəsinə çevrilmişdir. 20 yanvar ərəfəsində məktəbdə bu hadisələri özündə əks etdirən divar qəzetləri buraxılmış, məktəbdə şəhidlərin xatirəsinə guşələr yaradılmış, ayrı-ayrı siniflərdə ədəbi-bədii kompozisiyalar təşkil olunmuşdur. Həcər Mahmudovanın sözlərinə görə vətənpərvərlik ruhlu tədbirlər məktəbdə dövrü olaraq təşkil olunur. O, tədbirin təşkilatçılarına öz minnətdarlığını bildirdi.

Məktəbin tarix müəllimi, diyarşünaslıq mərkəzinin əməkdaşı Əlövsət müəllim 20 yanvar hadisələrinin tarixi köklərindən, ermənilərin və sovet imperiyasının Azərbaycan xalqına qarşı törətdiyi soyqrımlardan, deportasiyalardan bəhs etdi. Qeyd etdi ki, Azərbaycan xalqı əsrlər boyu olduğu kimi, bu gün də mübariz əhval ruhiyyədədir və öz torpaqlarını erməni qəsbkarlarından azad etmək əzmindədir.  

“Təhsil və zaman”