Təhsil Şurası Qarabağ həqiqətləri mövzusunda beynəlxalq elmi-təcrübi konfrans keçirdi

Konfransda ABŞ-nın Qarabağ Fondunun icraçı direktoru xanım Diana Kohen Altman da iştirak etdi.

6-7 mart 2015-ci il tarixlərində Azərbaycan Təhsil Şurası Bakı Pedaqoji Kadrların İxtisasartırma və Yenidənhazırlanma İnstitutunda (BPKİYİ) bu elm ocağı ilə birlikdə “Qarabağ həqiqətlərinin böyüyən nəslə çatdırılmasının elmi-metodiki və praktik məsələləri” mövzusunda beynəlxalq elmi-praktik konfrans keçirdi. Elmi-praktik konfransda Azərbaycan Təhsil Şurasının sədri, professor Əjdər Ağayev, Təhsil Şurası idarə heyətinin üzvləri BPKİYİ-nun rektoru, professor Asəf Zamanov, ADPU-nun kafedra müdiri professor Mirzəli Murğuzov, Təhsil İşçiləri Azad Həmkarlar İttifaqı Komitəsinin sədr müavini Şaiq Əsgərov, Qafqaz Universitetinin professoru Erdal Karaman, Böyükağa Mikayıllı, Həqiqə Məmmədova, Aliyə Təhmasib, Samir Mehdizadə, Kəmalə Qədirova, Sevinc Niftiyeva, konfransın təşkilat komitəsinin üzvləri Nizami Məmmədli, Arif İbrahimov, eləcə də respublikanın qabaqcıl müəllimləri, Qarabağ həqiqətləri mövzusunda araşdırma aparan tədqiqatçılar, təhsil işçiləri iştirak edirdilər. Konfransda ilk olaraq ermənilərin Azərbaycanlılara qarşı törətdikləri soyqrımdan bəhs edən dərs nümayiş olundu.

 Hər birimizin vətəndaşlıq borcu

Elmi-təcrübi konfransı giriş sözü ilə açan BPKİYİ-nun direktoru professor Asəf Zamanov söylədi ki, Azərbaycan Təhsil Şurasının “Qarabağ həqiqətlərinin böyüyən nəslə çatdırılmasının elmi-metodiki və praktik məsələləri” mövzusunda birgə konfrans keçirmək təklifini məmnuniyyətlə qəbul etdilər. Çünki bu mövzu Azərbaycan üçün böyük əhəmiyyət daşıyan bir məsələdir. Bu gün Azərbaycanın ağrılı yeri olan Qarabağ probleminin dünya ictimaiyyətinə çatdırılması, bu məsələnin həlli istiqamətində Azərbaycan prezidenti cənab İlham Əliyev dünya miqyasında fundamental xarakterili işlər həyata keçirir. Bütün bunlar torpaqlarımızın tezliklə işğaldan azad olunacağına böyük inam verir. Çox yaxşı haldır ki, Azərbaycan Təhsil Şurası müəllimləri bu mühüm mövzu ətrafında birləşdirmək, dünya ictimaiyyətinin diqqətini Qarabağ probleminə yönəltmək kimi əhəmiyyətli bir tədbiri həyata keçirməyi qərara almışdır. Hesab edirəm ki, bu, bizim hər birimizin vətəndaşlıq borcudur.

Azərbaycan Təhsil Şurasının sədri professor Əjdər Ağayev müəllimlərin Qarabağ həqiqətlərinin  dünya ictimaiyyətinə çatdırılması istiqamətində bir araya gələrək fikir bildirmələri, elmi-tədqiqat xarakterli yazılarla çıxış etmələrinin təqdirəlayiq hal olduğunu dilə gətirdi. O, Təhsil Şurasının həyata keçirdiyi elmi-təcrübi konfransın mahiyyətindən, ermənilərin Azərbaycan xalqına qarşı törətdikləri soyqrımlardan,

ölkəmizə qarşı irəli sürdükləri ərazi iddialarından, işğalçılıq niyyətlərindən bəhs etdi. Söylədi ki, bu gün müəllimlərinin qarşısında Qarabağ həqiqətlərinin dünya ictimaiyyətinə, eləcə də gənc nəslə çatdırılması kimi çox mühüm vəzifələr dayanır. Biz düşünürük ki, müəllimlər dərs prosesinin imkanlarından istifadə etməklə bu mühüm vəzifənin öhdəsindən gəlməlidir. Əjdər Ağayev vurğuladı ki, ötən ilin noyabrında Gürsüstanın Kabuleti şəhərində Şuranın təşkil etdiyi Beynəlxalq elmi-təcrübi konfransda da Qarabağ həqiqətlərindən bəhs olunub. İştirakçı müəllimlərimizin Qarabağın tarixi mövzusunda nümayiş etdirdikləri dərslər Gürcüstanlı müəllimlərin marağına səbəb olub. O, ümidvar olduğunu bildirdi ki, bu konfrans Azərbaycanın haqq səsinin dünya ictimaiyyətinə çatdırılmasına öz töhfəsini verəcək. Ə.Ağayev söylədi ki, konfrans materialları ABŞ-da və Azərbaycanda yayılması nəzərdə tutulan Azərbaycan, ingilis dillərində çap olunacaq “Realities of Karabakh” adlı kitabda yer alacaq. Kitabın nəşrinin Təhsil Şurası tərəfindən, yayımının ABŞ Qarabağ Fondu tərəfindən həyata keçirilməsi nəzərdə tutulur.

Daha sonar çıxış edənlər Təhsil İşçiləri Azad Həmkarlar İttifaqı Respublika Komitəsinin sədr müavini, İqtisad Universitetinin dosenti Şaiq Əsgərov, professor Mirzəli Murğuzov əsrlər boyunca davam edən erməni məkrnindən, onların təkcə Azərbaycana qarşı deyil, türk dünyasına qarşı tutduqları işğalçılıq siyasətindən bəhs etdilər.

Erməniçilik nədir və uydurma erməni soyqırımı

 Konfransda iştirak edən ABŞ-ın Qarabağ Fondunun icraçı direktoru xanım Diana Kohen Altman “Qarabağ həqiqətlərinin dünya ictimaiyyətinə çatdırılmasının metodoloji əsasları” mövzusunda məruzə etdi. O, məruzəsində vurğuladı ki, bu gün Azərbaycan müəllimlərinin qarşısında dayanan ən vacib məsələlərdən biri Qarabağın mədəniyyəti, incəsənəti, təhsili, ədəbiyyat tarixi, maddi-mədəni irs nümunələri və s. haqqında həqiqətə söykənən gerçəkliyi beynəlxalq ictimaiyyətə çatdırmaq, eyni zamanda bu həqiqətləri dərindən bilən gənclik formalaşdırmaqdır. Yalnız bundan sonra ölkənin haqq səsini dünyaya eşitdirmək mümkündür. Xanım Diana Altman daha sonra Qarabağ Fondunun ABŞ-da Qarabağ həqiqətləri ilə bağlı həyata keçirdiyi layihələrdən bəhs etdi. Söylədi ki, bu layihələr bütünlükdə Azərbaycan həqiqətlərinin Amerika ictimaiyyətinə çatdırılması məqsədi daşıyır. Xanım Diana Kohen Altman konfrans iştirakçısı olan müəllimlərdən Mehriban Məmmədovanın, Sevda Abuzərlinin və digərlərinin suallarını cavablandırdı.

Konfransın ikinci hissəsində tarix üzrə fəlsəfə doktoru, Bakı Dövlət Universitetinin müəllimi  Ülviyyə Əjdərqızı, Xəzər Universiteti və Dünya məktəbinin tarix müəllimi Arif İbrahimovun birgə hazırladıqları  "Erməniçilik nədir və uydurma erməni soyqırımı" adlı tədris filmi (metodik-praktik) nümayiş olundu. Film konfrans iştirakçıları tərərəfindən maraqla qarşılandı.

Martın 7-də konfrans öz işini bölmələrdə “Ayrı-ayrı fənlərin tədrisində şagirdlərə Qarabağda törədilən faciələrin mahiyyətinin öyrədilməsi”, “Xocalı soyqrımının təlim və tərbiyə işində şagirdlərə izahı”, “Erməni-daşnak qruplarının Qarabağda törətdikləri müharibə qırğınlarının nəticələri”,“Şuşa Azərbaycanın mədəniyyət və ticarət mərkəzi kimi.”,“Şuşa şəhərinin xanlıq mərkəzi kimi yaradılması və inkişafı”,“Şuşalı xanəndələr və musiqi xadimləri”, “Qarabağın mədəniyyət abidələri və mədəniyyət xadimləri”,“Xan qızı Xurşudbanu Natəvanın ədəbi-ictimai fəaliyyəti”, “Mir Möhsün Nəvvabın ensiklopedik dünyası”, “Qarabağda təhsilin təşkili və inkişafı”, “Qarabağ atlarının dünya məşhurluğu”, “Qarabağ – gözəlliklər dünyası”,“Ermənilərin Qarabağa köçürülməsi tarixi sənədlərdə”, “Qarabağda şifahi xalq ədəbiyyatı nümunələri”,“Erməni daşnaklarının Azərbaycanda törətdikləri soyqrımlar” mövzularında müəllimlərin, Qarabağ mövzusunda tədqiqat aparan alimlərin çıxışları ilə davam etdi.

Konfransın “Qarabağ həqiqətləri və onların tədrisi məsələləri” adlandırılan bölməsinə professor Əjdər Ağayev və professor Mirzəli Murğuzov, “Qarabağ həqiqətlərinin tədris prosesində böyüyən nəslə çatdırılması məsələləri” bölməsinə isə professor Asəfə Zamanov və professor Erdal Karaman rəhbərlik edirdilər.

Elmi-təcrübi konfransda  Azərbaycan Müəllimlər İnstitutunun Mingəçevir filialının müəllimi Mayıl İsmayılov  “Qarabağ həqiqətlərinin erməni yozumu”,  Şirvan şəhər T. Bağırov adına 11№-li tam orta məktəbin  tarix müəllimi Seyyub Əsədov “ Qarabağ həqiqətlərinin məktəblilərə öyrədilməsində tarixi qaynaqların rolu”,  İsmayıllı şəhər İ.Həsənov adına 1№-li tam orta məktəbin müəllimi Leyla Babayeva " Şuşa Azərbaycanın mədəniyyət və ticarət mərkəzi kimi",  Salyan rayon I Varlı kənd tam orta məktəbin müəllimi Nisə Fərəcova “Erməni-daşnak qruplarının Qarabağda törətdikləri müharibə qırğınlarının nəticələri”, Salyan şəhər A.Pənah adına 1 nömrəli humanitar fənlər təmaüllü məktəb-liseyin müəllimi, Respublikanın əməkdar müəllimi Zabul Əhmədov “Qarabağda təhsilin təşkili və inkişafı”,  Bakı  şəhəri  239 N-li tam orta məktəbin müəllimi Nübar Qayıblı “İşğal olunmuş Azərbaycan ərazilərində ekoloji vəziyyət”,  İsmayıllı şəhər N.Behdiyev adına 6 №-li tam orta məktəbin müəllimi Şayəstə Abdulova "Şuşalı xanəndələr və musiqiçilər", Azərbaycan Dövlət Pedaqoji Universitetinin Coğrafiya və Çağırışaqədər Hazırlıq  fakültəsinin dekan müavini, fəlsəfə doktoru Mirvari Verdiyeva “Coğrafiyanın tədrisində şagirdlərə Qarabağda törədilən faciələrin mahiyyətinin öyrədilməsi”,  Xəzər rayonu 324 № li tam orta məktəin müəllimi Vüsalə Hüseynova “Qarabağ mədəniyyəti”,  Astara şəhər Ceyhun Babayev adına 3 nömrəli tam orta məktəbin tarix müəllimi İlhamə Məmmədova

“Şuşa şəhərinin xanlıq mərkəzi kimi yaranması və inkişafı",  Cəmşid Naxçıvanski adına hərbi liseyin müəllimi Şəlalə Haqverdiyeva “Xocalı Soyqırımı haqqında həqiqətlər”, S. Bəhlulzadə adına Xarici  Dillər Təmayüllü Gimnaziyanın ibtidai sinif müəllimi İradə Məlikova “Şagirdlərə Qarabağda törədilən faciələrin mahiyyətinin öyrədilməsi”, Kürdəmir şəhər 1 nömrəli tam orta məktəbin müəllimi Mehriban Məmmədova “Qarabağ – sağalmaz yaramız”, Azərbaycan Dillər Universitetinin müəllimi Sevda Abuzərli "Azərbaycanın sağalmaz yaraları", Təhsil Nazirliyi Təhsil Sisteminin İnformasiyalaşdırılması İdarəsi  Treninq və Monitornq şöbəsinin müdiri Ramil Süleymanov “Ermənistan tarixi-Ermənilərin Azərbaycana qarşı soyqrım siyasətinin əsas mahiyyəti”  N.Behdiyev adına İsmayıllı şəhər 6 nömrəli tam orta məktəbin müəllimi Gülçohrə Fərəcova “ Xan qızı Xurşudbanu Natəvanın ədəbi- ictimai fəaliyyəti”, Qubadlı rayon S. Rəhimov adına Mahruzlu kənd  tam orta məktəbin ibtidai sinif müəllimi Məxmər Hüseynova “Erməni daşnaklarının Azərbaycanda törətdikləri soyqrımlar”,  Kürdəmir  şəhər  3  nömrəli  tam  orta  məktəbin müəllimi Günəş Xudiyeva “Xocalı    soyqırımının  təlim – tərbiyə  işində  şagirdlərə  izahı”,  Şəmkir rayon Aşağı Seyidli kənd Natiq Abbasov adına tam orta məktəbin müəllimi Xəyal Nəsibli “1918-ci il mart soyqrımın AXC tərəfindən yaradılmış fövqəladə istintaq komissiyası tərəfindən araşdırılması”, Xarici Dillər Təmayüllü Gimnaziyanın ibtidai sinif müəllimi Şəcahan Ramazanova  “Xocalı soyqırımının təlim və tərbiyə işində şagirdlərə çatdırılması yolları”, Şəmkir rayon Əliyaqublu kənd tam orta məktəbin müəllimi Türanə Məmmədova “Qarabağ xanəndəlik məktəbi”, Qafqaz Universitetinin professoru Erdal Karaman “Yoxolma təhlükəsindəki bir ağız: Qarabağ ağzı”,  N.Behdiyev adına İsmayıllı şəhər 6 nömrəli tam orta məktəbin müəllimi Əsgər Manafov “Şuşa şəhərinin xanlıq mərkəzi kimi yaradılması və inkişafı tarixindən”, Biologiya elmləri doktoru, Rusiya Keyfiyyət Problemləri Akademiyasının həqiqi üzvü Eyyub Bəşirov “Qarabağ cins atlarının yaradılması tarixindən”, Bakı şəhəri, Suraxanı rayonu 114 nömrəli tam orta məktəbin direktoru, Respublikanin əməkdar müəllimi Ceyran Novruzova “Qarabağ ərazisində tarixi mədəniyyət abidələri (Azıx mağarası)” mövzusunda çıxış etdilər.

Konfransın sonunda dünya ictimaiyyətinə müraciət-qətnamə qəbul olundu.

Martın 8-də konfrans iştirakçılarından bir qrupu Quba Soyqrım memorial abidəsini ziyarət etdilər.

Təhsil Şurasının mətbuat və ictimaiyyətlə əlaqə mərkəzi