Xarici Dillər Təmayüllü Gimnaziyada unudulmaz gü

    Aprelin 27-də Səttar Bəhlulzadə adına Xarici Dillər Təmayüllü Gimnaziyanın pedaqoji və şagird kollektivi maraqlı bir tədbirə tamaşa etdi. Gimnaziyanın ibtidai sinif müəllimi Şəcahan

Ramazanovanın birinciləri müəllimlərinin rəhbərliyi ilə pedaqoji elmlər doktrou, professor Əjdər Ağayevin kiçik yaşlı məktəblilər üçün yazdığı “Pişik balasının səhvi”  birpərdəli pyesini səhnələşdirib təqdim etdilər. Tamaşadan öncə çıxış edən Şəcahan Ramazanova söylədi ki, pyeslə tanış olan kimi onun səhnə variantını düşünmüş və şagirdlərini onun yüksək səviyyədə təqdim olunmasına hazırlamışdır. Professor Əjdər Ağayev bu əsəri uşaqların yaş xüsusiyyətlərini nəzərə almaqla elə ustalıqla qələmə alıb ki, uşaqlar onu sevə-sevə oxuyur, asanlıqla qavrayır, həvəslə ifa edirlər. O, ümidvar olduğunu bildirdi ki, birincilərin ilk işi olan bu tamaşa rəğbətlə qarşılanacaq, etimadı doğruldacaqdır.

Sonra səhnə birincilərin öhdəsinə verildi. Onlar öncə professor Əjdər Ağayevin keçdiyi şərəfli ömür yolunun ayrı-ayrı məqamlarından bəhs etdilər. Şəcahan Ramazanovanın hazırladığı bu ssenarini təqdiralayiq hal kimi dəyərləndirmək olar. İlk növbədə ona görə ki, birincilər atdıqları ilk kövrək addımlardan klassiklərimizi, mənəvi dəyərlərimizi tanımaq, onlar haqqında məlumat əldə etmək,  şərəfli ömür yolu keçmiş insanların həyat və fəaliyyətindən nümunə götürmək imkanı qazanırlar.  Şəcahan Ramazanovanın pedaqoji fəaliyyətindən xəbərdar olduğum üçün bilirəm ki, onun iş prinspinin əsasında birinci sinifdən başlayaraq şagirdlərin mənəvi tərbiyəsinə yönəlmiş tədbirlər aparıcı istiqamət təşkil edir.

Şagirdlər Əjdər Ağayevin keçdiyi həyat yolunu təqdim etmək üçün yazıçı-publisisit Böyükağa Mikayıllının görkəmli alinin ömür yolundan bəhs edən “İşıq” sənədli romanına müraciət etmişdilər. Onlar əsərin qəhrəmanından sitatlar gətirməklə,  Əjdər Ağayevin həm alim, həm də şəxsiyyət kimi obrazını açmağa çalışırdılar. Qırmızıkənd məktəbindəki ilk təhsil illərindən başlayır, tələbəlik illərini, təhsil aldığı görkəmli müəllimləri yada salır, elmin keşməkeşli yollarında keçdiyi çətin sınaqlardan bəhs edirdilər. Şəcahan Ramazanova kitabdan elə məqamları seçmişdi ki, bunlar həm uşaqların yaş, anlaq səviyyəsinə uyğun olsun, həm də onların mənvəi tərbiyəsinə təsir göstərsin.  

Səhnəyə əsərin məzmununa uyğun geyimdə çıxmış ifaçılar elə ilk andanca özlərinin ifa maneraları, tamaşanın ahənginə uyğun səs templəri, dinamik hərəkətləri ilə tamaşaçıların qəlbinə yol tapdılar. Tamaşaçı qarşısına ilk dəfə çıxan birincilərin gözlərində həm sevinc parıltıları, həm də həyacan var idi. Tezliklə həyacan öz yerini ifa etdiyi rola sevgidən qaynaqlanan sevincə verdi. Hər kəs öz rolunu daha maraqlı, cazibədar təqdim etməyə çalışırdı. Pyesdə yer alan ana sərçə, bala sərçə, pişik balaları, ana pişik, siçan, insan obrazlarının hər biri müvafiq xarakterik xüsusiyyətləri ilə təqdim edilirdi. Onlar pyeslə bərabər sanki, ifa etdikləri rolların da xüsusiyyətlərini mənimsəmişdilər. Azyaşlı olmaqlarına rəğmən əsərin ruhunu dərk edə, onu yaşayaraq təqdim etməyi bacarmışdılar. Təbii ki, bu ahəngi təcrübəli ibtidai sinif müəllimi Şəcahan Ramazanova təmin etmişdi.

Tamaşadan sonra çıxış edən professor Əjdər Ağayev də şagirdlərin ifalarından məmnun olduğunu dilə gətirdi. Qeyd etdi ki, şagirdlərin hələ ibtidai siniflərdən bu cür tədbirlərdə iştirakının təmin olunması onların dünyagörüşünün, mənəvi aləmlərinin formalaşmasında müstəsna rol oynayır. Sevindirici haldır ki, Xarici Dillər Təmayüllü Gimnaziyada bu kimi tədbirlərin təşklinə önəm verilir. Ə.Ağayev vurğuladı ki, Məhəmmədəli Abbasovun rəhbərlik etdiyi bu təhsil ocağı respublikamızın sayılıb-seçilən təhsil ocaqlarından biridir. Bu təhsil ocağı daim özünün ənənələri, əldə etdiyi nailiyyətləri ilə seçilib. Burada hər zaman dövrünün ən yaxşı müəllimləri çalışıblar. Əldə olunan nailiyyətlər də elə bununla bağlıdır.

Xarici Dillər Təmayüllü Gimnaziyanın direktrou Məhəmmədəli Abbasov professor Əjdər Ağayevin rəhbərlik etdiyi təhsil ocağında görməkdən məmnunluq ifadə etdi. Qeyd etdi ki, professor Əjdər Ağayevin fundamental elmi tədqiqat əsərləri elmi-pedaqoji, təhsil ictimaiyyəti üçün nə qədər önəmlidirsə, uşaqlar üçün qələmə aldığı şeirlər, hekayələr, pyeslər də o qədər əhəmiyyətlidir. Əjdər Ağayevin uşaqlar üçün qələmə aldığı şeirlər qırx ildən artıqdır ki, balacalar tərəfindən sevilərək oxunur. Azərbaycanın görkəmli bəstəkarları Oqtay Rəcəbov, Rəşid Şəfəq və başqaları onun uşaq ruhunu oxşayan, tərbiyəvi mahiyyət daşıyan şeirlərinə elə onun, eləcə də uşaqların ruhuna uyğun mahnılar bəstələmişlər. Biz bu gün o mahnılardan bir neçəsini Şəcahan müəllimin şagirdlərinin ifasında dinlədik.  

Məhəmmədəli Abbasov söylədi ki, Əjdər Ağayevin bu pyesinin leytmotivini böyük mütəfəkkir Nizami Gəncəvinin soylədiyi “Qüvvət elmdədir, başqa cür heç kəs, heç kəsə üstünlük eyləyə bilməz”  aforizm təşkil edir. Əjdər müəllim bu pyesi ilə aşılayır ki, insanın həyatda yüksələ biləcəyi ən yüksək mərtəbə yalnız ağılla və elmlə mümkündür. O, görkəmli alimə cansağlığı, yeni-yeni yaradıcılıq uğurları arzuladı. 

Böyükağa MİKAYILLI