Arzularına qovuşan müəllim

Həyatda  ən  gözəl  şey  dünyanı  anladığın  gündən  arzularının  reallığa   çevrilməsidir. İnsanın  hər  bir  arzusu  həqiqətə  çevrildikcə, sanki  həyatının  yeni  bir  dövrünü  yaşayır, təbiətdən  doyunca zövq  alır,  mavi səmalar  isə  onun üçün  tayı-bərabəri  olmayan  laləzarlıq olur. Heç vaxt yorulmayan  göylər şahı qartal kimi qanad  çalır, süzdükcə süzür, uçduqca uçur... Bu  zaman  həyatın  bütün  gözəllikləri çılpaqcasına gözlərin önündə canlanır, dünyada özünü xöşbəxtlərin xöşbəxti hesab edirsən.

Bəli, arzuları solmayan çiçək kimi açılan xöşbəxt insanlardan biri də Bakı şəhəri, 129 nömrəli tam orta məktəbin ibtidai sinif müəllimi Səyyarə Səfər  qızı Vəliyevadır. Səyyarə müəllim vətənimizin dilbər guşələrindən biri  olan Ağdamda dünyaya göz  açmışdır. O, orta məktəb illərindən fədakar  müəllimlərin uşaqlara olan hüsn-rəğbətini, mehribanlığını, elmin sirlərini  yorulmadan onlara öyrətdiklərini gördükcə onun qəlbində  gələcəkdə  yaxşı  bir  müəllim  olmaq  arzusu  boy  atıb  böyüməyə  başlayır. Bu minvalla  Səyyarə orta təhsilini bitirdikdən sonra müəllim olmaq üçün  sənədlərini APİ –nin (indiki  ADPU-nun) ibtidai təhsilin pedaqogikası və metodikası fakültəsinə verib oraya daxil olur. Səyyarə Vəliyeva ali təhsil  illərini müvəffəqiyyətlə başa vurub, təyinatı üzrə Bakının Nizami  rayonundakı 129 nömrəli tam orta məktəbdə müəllimlik fəaliyyətinə başlayır. O, işlədiyi müddətdə öz bilik və bacarığı ilə tez bir zamanda fərqlənərək, şagird və müəllim kollektivinin dərin hörmətini qazanır. Məktəbdə onu  ən yaxşı bir müəllim kimi tanıyırlar. Səyyarə müəllim bir müddət  işlədikdən sonra ailə səadətinə qovuşur və tezliklə ana olur. O, hal-hazırda  da 129 nömrəli tam orta məktəbdə ibtidai sinif müəllimidir. Səyyarə xanım öz  amalına sadiq olaraq var qüvvəsi ilə çalışır, dərs  dediyi  şagirdlərlə  doğma  bir ana kimi rəftar edir, onlara qayğı göstərir, elmin ibtidaisini səbr və  təmkinlə  öyrədir. Səyyarə xanım yeniliyi sevən, təlimdə  müasir  metodları  bacarıqla tətbiq edən qabaqcıl müəllimdir. O, bir qayda olaraq, dərslərdə  əyanilik və texniki vasitələrdən lazımınca istifadə edir. Elə bütün bunlara  görə  onun  dərs  dediyi  uşaqlar  istər  təlimdə,  istərsə  də  tərbiyədə  seçilirlər. Bunun  nəticəsidir  ki, əlamətdar və  tarixi günlərdə, tədbir və yığıncaqlarda Səyyarə müəllim və onun  şagirdləri müntəzəm olaraq fəal iştirak edirlər. Onun qəlbi yaşayıb-yaratmaq  və  uşaqları  Vətənimizə  layiqli  bir  vətəndaş  kimi  yetişdirmək  eşqilə doludur. Gənc müəllimlər tez-tez Səyyarə müəllimə  müraciət edir və ondan müəllimlik peşəsinin  sirlərini öyrənirlər. Səyyarə xanım həqiqətən, kollektivdə dərin hörmətə malik olan nümunəvi  müəllimdir. Çəkilən zəhmət barsız olmaz. Səyyarə xanımın da uzun illər çəkdiyi  zəhmət barsız olmadı. 30 ildən artıq eyni kollektivdə, eyni peşədə  yorulmadan, həvəslə çalışan Səyyarə xanım öz bəhrəsini dərdi. O dəfələrlə  fəxri fərman və mükafatlarla təltif  olunub, 2 dəfə  “İlin ən yaxşı  müəllimi”  fəxri  adına  layiq  görülüb. Elə  bu  dərs  ilinin  sonunda - 30  may  2014-cü ildə Səyyarə xanıma məktəb rəhbərliyi tərəfindən fəxri fərman verilib. Kollektivə qarşı mehriban və eyni zamanda tələbkar olan  məktəbin direktoru Samir Mehdizadə və dərs hissə müdiri  Həqiqət  Salmanova Səyyarə xanımın pedaqoji fəaliyyətini izləyir, ona  tədris  üçün  lazım olan  bütün  şəraiti  yaradır, qayğı  göstərirlər. Elə bu səmimiyyət və tələbkarlığın nəticəsidir ki, məktəbdə istər şagird, istərsə də pedaqoji kollektiv arasında sağlam  əhvali-ruhiyyə  hökm  sürür. Söz düşəndə Səyyarə xanım ona və kollektivə qarşı səmimi olan Samir  Mehdizadə və Həqiqət  Salmanovaya öz  minnətdarlığını bildirir. Müəllim peşəsinin incəliklərini dərindən  bilən, bu  adın şərəfini həmişə böyük zəhməti bahasına qoruyub saxlayan Səyyarə müəllim yüzlərlə məzununun  xatirəsində xoş izlər salmışdır. Böyüməkdə olan gənc nəslin təlim-tərbiyəsində, vətənə məhəbbət ruhunda yetişdməsində ömrünü sərf  edən  Səyyarə  müəllimə  bundan sonrakı fəaliyyətində də uğurlar diləyirik.

Sevinc NİFTİYEVA, Şirvan şəhər 9 nömrəli tam orta məktəbin müəllimi, “Ən yaxşı müəllim” müsabiqəsinin qalibi