Dil böyük bir aləmdir

 Rəbiyyə BAYRAMOVA,

129 nömrəli Məktəbin ingilis dili müəllimi

 Hal-hazırda elm və texnika o qədər inkişaf edib ki, hamı dünyanın istənilən ölkəsinə gedə bilir. Yalnız bir şərtlə, o da dil bilmək. Müasir dövrdə insanları bir-birinə yaxınlaşdıran, onlar arasında ünsiyyət  yaradan yeganə faktor dildir. Məktəbimizdə belə dillərdən biri sözsüz ki, ingilis dilidir. İngilis dilini öyrənmək elmi biliklər xəzinəsinə baş vurmaqdır. Xarici dil bilmək gələcəkdə iş tapmaq şansını artırır. İngilis dilini nəyə görə öyrənmək lazımdır?

İngilis dilinin öyrənilməsinin fərdi və ümumi əhəmiyyəti:

Bu gün ingilis dilini öyrənmək bir sıra səbəblərə görə zəruri əhəmiyyət kəsb edir:

Birincisi, ingilis dili “beynəlxalq ortaq dil” statusunu qazanmış ilk dildir, yəni başqa dillərdə danışan insanlar arasında ortaq ünsiyyət vasitəsidir. İngilis dili müasir dünyada ən çox danışılan dillərdən biridir. Yer kürəsinin ən güclü dövləti ABŞ başda olmaqla, Avstraliya, Böyük Britaniya, CAR, Yeni Zelandiya, İrlandiya və Sinqapur kimi inkişaf etmiş ölkələrin dövlət dilidir. İngiliscə 400 milyon insanın ana dili, bir milyard 400 milyon insanın isə ikinci dilidir. 53 ölkənin və BMT də daxil olmaqla əksər beynəlxalq təşkilatların əsas rəsmi dillərindən biri, İngilis dilidir. Bu dil Millətlər Birliyinin rəsmi dilidir. Bu dil Okeaniyadan Avropaya, Afrikadan Amerikaya qədər dünyanın hər tərəfində əsas ünsiyyət vasitəsidir.

İkincisi, ingilis dili hal-hazırda dünyada diplomatiya, kommersiya, dənizçilik, elmi-texniki və kütləvi informasiya dili rolunu oynayır.

Üçüncüsü, iki, üç və daha çox dil bilmək dünyagörüşünün formalaşmasına müsbət mənada təsir edir, hadisələrə daha geniş prizmadan baxmağa kömək edir. Volterin sözü ilə desək, çox dil bilmək bir qalanın bir neçə qapısının açarına sahib olmaqdır. Bir fərd nə qədər savadlı olsa da, əcnəbi dil bilmədən biliyini dar çərçivədən çıxarıb daha da təkmilləşdirməsi, dünya təcrübəsindən faydalanması, elmi mübadilə aparması mümkün deyildir.

Dördüncüsü, ingilis dilini bilmək iş tapmaqda başlıca rol oynayır. Belə ki, bu gün yerli və xarici şirkətlər ingilis dilini səlis bilən mütəxəssislərə üstünlük verirlər.

Beşincisi, ingilis dilini bilmək vaxta və xərclərə qənaət etmək deməkdir. Tərcüməçiyə müraciət etmədən informasiyanı alır, analiz edir, ötürür, bir sözlə, öz işimizi özümüz görürük.

Altıncısı, bu gün nəşr olunan və son iki əsrdə nəşr olunmuş ədəbiyyatların və kütləvi mətbuatın böyük qismi, internet resurslarının 80%-i ingilis dilindədir. Yəni istər elmi biliklərin öyrənilməsində, istər diplomatik münasibətlərin, istər ticari, iqtisadi əlaqələrin qurulmasında, istər xarici ölkələrə səfərlərdə dünyanın hansı ucqar nöqtəsi olur-olsun, ingilis dili əvəzedilməz funksiya ifa edir.

Bütün bu səbəblərdən ingilis dilini bilmək Qarabağ kimi ciddi problem olan və bunu beynəlxalq normalar çərçivəsində sülh yolu ilə həll etməyə çalışan bir ölkənin vətəndaşları olaraq bizim üçün də vacib əhəmiyyət kəsb edir. Güclü bir dövlətlə möhkəm siyasi və iqtisadi əlaqələr qurmaq üçün onun dilini, dilinə hopmuş təfəkkürünü, düşüncəsini, meyarlarını, eyni zamanda zəif nöqtələrini bilmək zəruridir. Beynəlxalq təşkilatlarda Azərbaycanın həqiqətlərini – Qarabağ problemini, Xocalı soyqırımını səsləndirmək, xarici ölkələrdə diasporların fəaliyyətini daha da gücləndirmək, siyasi dairələrə güclü təsir etmək, diplomatik gedişatda rəqibi məğlub eləmək, dövlət maraqlarını daha güclü şəkildə diktə etmək ingilis dilini, eləcə də digər dünya dillərini necə deyərlər “nöqtəsinə, vergülünə” qədər mənimsəmiş savadlı və vətənpərvər vətəndaşlar yetişdirməkdən asılıdır. Və sırf bu səbəblərə görə də məktəbimizdə ingilis dilinin öyrənilməsinə xüsusi diqqət yetirilir. Məktəbimizdə bütün bayramlar ətraflı qeyd olunur. İngilis dili müəllimələrinin də bu tədbirlərdə payı çoxdur. Müəllim günü, Müstəqillik günü, 20 Yanvar, milli və beynəlxalq bayramlarımız (Yeni İl və Novruz Bayramı),  Yer kürəsini qoruyaq, Xocalı faciəsi, Analar günü və Heydər Əliyevin anadan olmasının 92-ci ildönümünə həsr edilmiş fləşmob və bir çox başqa tədbirləri buna misal göstərmək olar. Əksər ingilis dili müəllimlərinin dərsləri açıq elan olunub. Bu gərgin əməyin bəhrəsini artıq hiss edirik. 9-cu sinif şagirdi Fəridə Əkbərli iştirak etdiyi ingilis dili müsabiqəsində biliyini məharətlə nümayiş etdirərək, İngiltərədə yerləşən “Buckswood School”-a 2 həftəlik yay məktəbində iştirak hüququ qazanıb. Uğurların sırası, şübhəsiz ki, genişlənəcəkdir.