Vətənə məhəbbət dərsləri 24 May 2014

İradə ƏLİYEVA,

"Azərbaycan" 

 Müəllim adı bütün zamanlarda şərəfli olub. İstər şəhərdə, istərsə kənddə insanlar bu peşə sahiblərinə həmişə hörmət, ehtiram bəsləyiblər. Yüksək müəllim adını daşıyanlar isə daim bunun məsuliyyətini, mənəvi cavabdehliyini hiss ediblər. Axı onlara xalqın ən qiymətli sərvəti - gənc nəsil, vətənin sabahı etibar edilib.

Müəllim nümunə deməkdir. Təsadüfi deyil ki, ziyalı sözünü işlədəndə də nədənsə, ilk növbədə, insanın gözü önünə müəllimlər gəlir. Çünki ömürlərə işıq müəllimin biliyindən, ziyasından düşür.

Hansı fənni tədris etməsindən asılı olmayaraq bu peşə sahibləri ziya, bilik bəxş edəndir. Haqqında danışacağımız müəllimin keçdiyi fənn isə bir qədər qeyri-adidir. O, artıq 30 ildən çoxdur orta məktəbdə gənclərin çağırışaqədərki hazırlığı ilə məşğuldur.

Bakının Nizami rayonundakı 129 nömrəli tam orta məktəbdə çalışan İsfəndiyar Əliyevin pedaqoji fəaliyyəti ən yaxşı müəllimlik nümunələrindəndir. Keçdiyi həyat yolu isə şagirdlərinə, yetirmələrinə bir örnəkdir.

İsfəndiyar Əliyev 1951-ci ildə Lənkəran rayonunun Vilvan kəndində anadan olub. 1968-ci ildə orta təhsilini başa vurduqdan sonra ordu sıralarına çağırılıb. İki illik hərbi xidmətini o vaxtkı Almaniya Demokratik Respublikasında keçirib.

Deyirlər, əsgərlik həyatı da bir məktəbdir. İsfəndiyar Əliyev bu məktəbdən yaşıdlarından bəlkə də daha çox bəhrələnib. Əvvəla, qürbət onun doğma torpağa, Vətənə məhəbbətini artırıb. Uzaqlarda yurdunun həsrətini çəkə-çəkə onun nə qədər əziz olduğunu bir daha dərk edib. Üstəlik də həmin illər İsfəndiyarın gələcək həyat yolunu müəyyənləşdirib. Burada, o, hərb sənətinin sirlərinə dərindən yiyələnib, mətinliyin, qəhrəmanlığın, mərdliyin nə olduğunu tam mənası ilə anlayıb. Özü də bərkdən-boşdan çıxaraq gənc zabit kimi formalaşıb.

Təbii ki, hərbidən doğma kəndinə qayıdıb. Orada bir müddət sovxozda işləyib. Amma o, təhsilini davam etdirmək, xalqa daha çox xeyir vermək arzusu ilə yaşayırdı. Ona görə də Xarici Dillər Universitetinə daxil olur. Ali məktəbi bitirdikdən sonra Bakıdakı 129 nömrəli təhsil ocağında işləməyə başlayır. Elə həmin vaxtdan da burada Gənclərin Çağırışaqədərki hazırlığı rəhbəridir.

"Ömrümün 34 ilini gənclərin vətənpərvərlik tərbiyəsinə həsr etmişəm. İşlədiyim illər ərzində məqsədim vətənini, torpağını sevən, onların müdafiəsinə daim hazır olan gənclər yetişdirməkdən ibarət olub. İşimdən həmişə zövq almışam, müəllim adı, şərəfli peşəmlə həmişə fəxr etmişəm". Bu, İsfəndiyar müəllimin öz tərcümeyi-halına "sözardı" kimi yazdığı cümlələrdir. Özü də gəlişi gözəl olduğu üçün deyilən sözlər deyil. Onlarda sadə bir həqiqət, bir insanın vicdan və ləyaqətlə xalqına xidmətinin ifadəsi var.

İsfəndiyar müəllim ulu öndər Heydər Əliyevin "Mən Yer üzündə müəllimdən yüksək ad tanımıram" sözlərini tez-tez xatırlayır. Deyir ki, bu sözlər əslində dəyərli kəlamdır, müəllimlərin üzərinə çox böyük məsuliyyət yükü qoyur. Odur ki, İsfəndiyar Əliyevin özü də həmin kəlamla verilən etimadı daim doğrultmağa çalışır.

Təcrübəli pedaqoq İsfəndiyar Əliyev onu da deyir ki, bu gün bütöv şəxsiyyət probleminin müsbət həlli məktəbdən, tədris sistemindən çox asılıdır. Məqsəd uşaqların aldığı  biliklərin dərinləşdirilməsi ilə bərabər, həm də onların dünyagörüşünü, mənəvi zənginliyini artırmaqdır. Müəllimlər şagirdlərə həm də Vətəni sevməyi, xalqa sədaqəti, qanunların aliliyinə hörmət bəsləməyi, saf mənəviyyatla yaşamağı öyrətməlidirlər. Uşaqlar təkcə özlərini deyil, ətrafındakıları düşünməyi bacarmalı, insanlar üçün yaşamağı da bəri başdan öyrənməlidirlər.

Qabaqcıl müəllimin tədris etdiyi fənnin bir sıra özəllikləri var. Belə ki, bu fənn təkcə bir sahədə bilik verməklə kifayətlənmir. Həm də şagirdlərdə müəyyən vərdişlər yaratmağa xidmət edir. Ən başlıcası isə torpaq, yurd sevgisi aşılayır, mərdlik, mübarizlik, hünər öyrədir. İsfəndiyar müəllim bu fənni tədris etdiyi vaxtlardan həmin şərtlərə önəm verir və bildiklərini uşaqlara həvəslə öyrədir. Mayor rütbəsində ehtiyatda olan zabit İsfəndiyar Əliyev yetirmələrinə anladır ki, mərdlik insanın mənəvi gücünü və möhkəmliyini ifadə edən davranış əlamətidir, qorxuya nifrətdir. İnsan hara gedirsə-getsin, nə kimi rütbələrə, vəzifələrə qalxırsa-qalxsın, dəxli yoxdur, doğma yurda məhəbbət onun xəyalından bir an belə silinmir. Xüsusilə müharibə şəraitində olan bir ölkədə ordu quruculuğu, gənclərin hərbi vətənpərvərlik ruhunda tərbiyəsi, onların hərbi xidmətə hazırlanması mühüm məsələlərdəndir. Ehtiyatda olan zabit ixtisas dərslərində yetirmələrinin Azərbaycan Silahlı Qüvvələri haqqında dolğun şəkildə məlumatlandırılmasına, onların zəruri hərbi nizamnamə qaydalarını mənimsəmələrinə, ordu həyatı ilə tanışlıqlarına, habelə gənclərin fiziki və psixoloji cəhətdən hərbi xidmətə hazırlanmalarına xüsusi diqqət yetirir, onlar arasında ölkənin hərbi məktəblərində təhsil almaq istəyənlərin, yəni namizədlərin seçilməsində güclü peşə təmayüllü iş aparır. Yeniyetmələrə görkəmli sərkərdələrin, milli qəhrəmanlarımızın döyüş yolu haqqında söhbətlər edir, müxtəlif filmlərə baxış keçirir. Yurdsevərliyin, vətənpərvərliyin kökləri çox qədimdir. Vətənpərvərlik millətin tarixinə, mədəniyyətinə dərin hörmətdə, milli ənənələrə əməl olunmasında, torpağın, onun sərvətlərinin göz bəbəyi kimi qorunmasında təzahür edir. Hazırda İsfəndiyar müəllimin onlarla yetirmələri Azərbaycan Respublikasının Silahlı Qüvvələrində hərbi bilik və bacarıqlarını nümayiş etdirərək nümunəvi xidmət göstərirlər.

129 nömrəli məktəbin direktoru Samir Mehdizadə deyilənləri belə təsdiqləyir:

- Məktəbimizdə müasir dövrün tələblərinə uyğun gənclərin çağırışaqədərki hazırlığı kabinetinin yaradılmasında İsfəndiyar müəllimin böyük əməyi olub. Bura 2005-ci ildən Nizami və Nərimanov rayonları arasında baza kabineti kimi fəaliyyət göstərir. Vaxtaşırı tədris vəsaitləri yeniləşdirilir və təkmilləşdirilir, müxtəlif ədəbiyyatlarla zənginləşdirilir. Fənnin tədrisində Heydər Əliyev Fondunun dəstəyi ilə çap olunan plakat və kitabçalardan geniş istifadə olunur. Bütün bunlara görə də rayon hərbi rəhbərlərinin seminar-məşğələləri məhz bu kabinetdə keçirilir. İsfəndiyar Əliyevin özü haqqında onu deyə bilərəm ki, o, tədris prosesinə bir sıra yeniliklər gətirdiyi üçün novator hərbi hazırlıq müəllimi kimi tanınıb. Buna İsfəndiyar müəllimin əməksevərliyi, peşəsinə vurğunluğu, işə yaradıcı yanaşması imkan verib.

Bir neçə kəlmə də 129 nömrəli məktəb haqqında. Bura, pedaqoji kollektivin intellektual səviyyəsi ilə seçilən bir məktəbdir. Təhsil ocağında dərslərin keyfiyyətli və səmərəli keçirilməsinə, informasiya-kommunikasiya texnologiyalarından istifadəyə geniş yer verilir.

Məktəb 2012-2013-cü tədris ilində "İlin ən yaxşı ümumtəhsil müəssisəsi" müsabiqəsində iştirak etmişdir. Müsabiqə çərçivəsində Təhsil Nazirliyində məktəbin təqdimatı keçirilmiş, IX və XI sinif şagirdləri test imtahanlarında iştirak etmişlər. Ötən ilin göstəricilərinə görə təhsil ocağının məzunlarının ali məktəblərə qəbulu 70,91 faiz olmuşdur.

Məktəbdə peşəsinin, tədris etdiyi fənnin bilicisi olan müəllimlər çoxdur. Elə İsfəndiyar Əliyevin təcrübəsindən digər məktəblərdəki həmkarlarının da istifadə etməsi buna aydın misaldır.

İsfəndiyar Əliyevin iş təcrübəsi neçə illərdir ki, Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) Bakı şəhəri Nizami Rayon İdarəsi tərəfindən bəyənilmiş və yüksək qiymətləndirilmişdir. Ona təşəkkür məktubları göndərilmiş, fəxri fərmanlar verilmişdir. İsfəndiyar müəllim eləcə də 2009-cu ildə Bakı Şəhər Təhsil İdarəsinin "Pedaqoji sahədə səmərəli fəaliyyətinə və gənc nəslin təlim-tərbiyəsində qazandığı nailiyyətlərə görə" fəxri fərmanını almışdır. 2010-cu ildə isə tədrisdə mütərəqqi prinsiplik, yeniliklərin tətbiqinə, səmərəli işinə görə Təhsil Nazirliyi onu "Azərbaycan Respublikasının qabaqcıl təhsil işçisi" döş nişanına layiq görmüşdür.

Gənclərin Çağırışaqədərki hazırlığı rəhbəri İsfəndiyar Əliyev pedaqoji sahədəki səmərəli fəaliyyətinə və Vətənini, torpağını sevən, doğma yurdunun müdafiəsinə daim hazır olan gənclər yetişdirdiyinə görə sonrakı illərdə də dəfələrlə fəxri fərmanlar alıb. Bunlardan biri məktəbin "Şahinlər" hərbi-idman oyunları komandasının təşkili və oyunda uğurla iştirak etməsi münasibətilə bu ilin mart ayında verilib. Aprel ayında isə İsfəndiyar  müəllim SHXÇDX-nin təşəkkürnaməsini alıb.

Təcrübəli təhsil işçisi "Gənclərin Çağırışaqədərki hazırlıq" dərsliyi proqramının tərtib edilməsində komissiyanın tərkibində iştirak edib. 2011-2012-ci illərdə isə  dərsliyin qiymətləndirmə şurasının ekspert komissiyasının üzvü olub.

Yaxşı müəllim olmaq çətindir. Ona görə ki, gərək peşənin vurğunu olasan, uşaqları ürəkdən sevəsən və tədris etdiyin fənni dərindən biləsən. Deyirlər ki, hər bir insanın dəyəri onun niyyətindən, arzularından bəlli olur. Məslək, əqidə, mübarizə və əxlaq dərslərində ilk növbədə şagirdlərinə cəsarət və qətiyyət aşılayan İsfəndiyar Əliyevin bu illər ərzində əsas amalı Vətən yükünü çəkə bilən ləyaqətli gənclər yetişdirməkdir.