FİZİKANI NECƏ SEVDİRİRİK?

Nüşabə QURBANOVA,

129 N-li Məktəbin fizika fənni üzrə metodbirləşmə sədri

Hər bir müəllimin ən böyük istəyi keçdiyi mövzunun şağirdlər tərəfindən asanlıqla  mənimsənilməsinə nail olmaqdır. Biz fizika müəllimləri də 2014-2015-ci tədris ilini uğurla başa vuraraq buna nail olmağa çalışırıq. İstər dərslərimizdə, istərsə də dərsdənkənar işlərimizdə istedadlı şağirdlərin aşkarlanması istiqamətində mühüm işlər aparırıq. Məqsədimiz dövlətin təhsilə diqqət və qayğısının nəticəsi olaraq nəticələrimizi yüksəltmək və ölkəmiz üçün bilikli, savadlı, vətənpərvər vətəndaşlar yetişdirməkdir. Bunun üçün məktəbdə şağirdlərin olimpiadaya hazırlanmasında, divar qəzetlərinin çıxarılmasında, şağirdlərin əl işlərinin hazırlanmasında fizika müəllimləri mühüm işlər görmüşdür. Metodbirləşmənin hazırladığı “Gənc fizik” divar qəzeti daim yeniliklərlə müəllimlər və şağirdləri xəbərdar edir. Texnologiyanı tədrisə tətbiq etmədən nəticələrin yaxşılaşdırılmasına nail olmaq inandırıcı deyil.

Tədris prosesində uyğun texnologiyalardan istifadə, kompyüterlərdən istifadənin  artırılması, “göz qavraması” üçün daha çox əyani vasitələrdən istifadə edilməlidir. Yeni pedaqoji texnologiyaların tətbiqi təlim prosesinin əsas hərəkətverici qüvvələri olan şagirdlərin idrak maraqlarının təşkili və inkişaf etdirilməsinə imkan verir. Mən də öz dərslərimdə çalışıram ki, müasir dərsi layihiləşdirərkən yeni pedaqoji texnologiyalardan və İKT-dən istifadə edim. Bu interaktiv yanaşmada bir çox texnoloji proqramları təlim texnologiyası ilə sintez etmək bir pedaqoq kimi biz müəllimlərdən yüksək bilik və bacarıq tələb edir. Bu bacarıqlara yiyələnmək üçün daim öz üzərimdə işləyirəm, müxtəlif treninqlərdən, kurslardan keçərək öz biliklərlərimi artırmağa çalışıram və dərslərimdə tətbiq edirəm. Şübhəsiz uşaqlar öz  maraqlarına səbəb olan hər bir görüntünü yüksək həvəslə öyrənməyə çalışırlar. Bu mənada fizika müəllimləri şagirdlərdə dərsə maraq oyatmaq və fənni mənimsətmək üçün bütün vasitələrdən istifadə edirlər. Müəllimlərimizdən 7-ci siniflərdə dərs deyən Sevda Qasımova özünün bütün dərslərini təcrübələrlə, şagirdlərin düzəltdiyi əl işləri ilə, diskussiyalarla quraraq fizikanı şagirdlərə sevdirir. Onun dərsləri maraqlı və məzmunlu keçir. Məktəbimizin fizika müəllimi Rübabə Həsənova da şagirdlərin fizika fənninə olan meyl və maraqlarını artırmaq üçün müxtəlif təlim metodlarından istifadə etməyə çalışır. Müəllimlərmizdən Məhluqə Hüseynova   sinif rəhbəri kimi təşkil etdiyi ekskursiyalarda müxtəlif texniki eksponatlarla şagirdləri tanış edir.

Məktəbin direktoru Samir Mehdizadə məktəbdə həyata keçirilən tədbirlərdə pedaqoji kollektivin qarşıya qoyduğu məqsədə çatmasına, məktəbdə müvafiq şəraitin yaradılmasına, şagirdlərin yaradıcılıq işlərinə cəlb olunmasına, istedadlı şagirdlərin aşkara çıxarılmasına, qabaqcıl iş təcrübəsinin öyrənilməsinə çalışır, məktəbdə fəaliyyət və münasibətlərə xüsusi diqqət göstərir. Ona görə bütün müəllimlər, o cümlədən fizika müəllimləri çox həvəslə işləyirlər. Hər bir müəllimin dərs proqramı, gündəliyi və dərsə aid materialları yerində olmaqla özlərinə qarşı çox tələbkardırlar. Buna görə də biz direktorumuza minnətdarıq və ona quruculuq işlərində müvəffəqiyyətlər arzulayırıq.