ŞAGİRDLƏRİN VƏTƏNPƏRVƏRLİK RUHUNDA TƏRBİYƏSİ

Svetlana ƏMİROVA,

 129№li Məktəbin Azərbaycan dili və ədəbiyyat müəllimi 

İnsan özünü dərk etdiyi  gündən  həyat yolunu seçməli, seçdikləri naminə mübarizə aparmalı ,  məqsədinə  çatmaq üçün fədakarlıq göstərməlidir. Bunları əldə etmək üçün bizə yardımçı və istiqamət verən bir məkan , daim bizi xoş gələcəyə səsləyib, keçmişimizi xatırladıb,  bu günümüzlə yaşayan insanlar olmalıdır. Bu məkan – məktəb, bu insan – müəllimdir. İlk dəfə məktəbə addım atan hər bir şagird yeni həyata atıldığını dərk edir. Bu baxımdan  məktəb və müəllimin gənc nəslin tərbiyəsindəki rolu danılmazdır. 

Bakı şəhəri, Nizami rayonunda yerləşən 129№li tam orta məktəb də öz yenilikçiliyi,  müəllimlərinin intellektual səviyyəsi, ciddi  nizam-intizamı, öz işinin bilicisi olan rəhbərliyi, sənətinin vurğunu olan müəllim kollektivi ilə seçilən bir təlim – tərbiyə ocağıdır. Məktəbin həyətində öz doğma şagirdlərinin Qarabağ müharibəsində şəhidlik zirvəsinə ucaldığını nümayiş etdirən abidə ucaldılmışdır. Hər gün məktəbə gələn müəllim və şagirdlər bu abidənin önündən keçir, onların ruhları qarşısında baş əyirlər. Məktəblilər onlar kimi vətənpərvər olacaqlarına öz kiçik qəlblərində and içirlər. Əgər məktəb qapısının astanasında şagirdlər bu hissi yaşayırlarsa , deməli , təhsil aldıqları məktəbdə xalqın vətənpərvər ruhlu şagirdləri yetişir. Məktəbin foye və dəhlizləri məktəbə ilk gəlişdən bu təhsil ocağının ab–havasından xəbər verir. Ulu Öndər Heydər Əliyevin keçdiyi həyat yolunu, onun davamçısı olan ölkə başçısı cənab İlham Əliyevin fəaliyyətini, 129№li məktəbin nailiyyətlərini,  xalqımızın qəhrəmanlıq salnaməsini əks etdirən lövhələr şagirdlərin gələcəyə hansı yollarla gedəcəklərini, necə bir vətəndaş kimi yetişəcəklərini onların gözləri önündə canlandırır.

Şagirdlərin xalqının əsl vətəndaşı kimi yetişməsində məktəb kollektivinin birgə fəaliyyəti ön planda durur. Belə ki, şagirdlərin dünyagörüşünün formalaşmasının, təhsildə uğur qazanmalarının ilk şərti məktəb rəhbərliyinin məktəbdaxili işinin düzgün qurulmasındadır. Şagirdlərin öz elinə, obasına bağlılığını, doğma Vətəninə olan sevgisini, vətənpərvər bir şagird kimi formalaşmasını təmin etmək üçün məktəbdə keçirilən tədbir, görüş və layihələrin sırası genişdir. “Milli Qəhrəmanlarımızı tanı” layihəsinin tədbirlərindən birinin məktəbdə keçirilməsi bunun bariz nümunəsidir. Şagirdlər bugünkü tariximizin canlı yaradıcıları ilə - Milli Qəhrəmanlarımızla  görüşlərdə əfsanəvi Koroğlunun, Qaçaq Kərəmin davamçıları ilə canlı ünsiyyətdə olurlar. Onların keçdiyi həyat yolu, göstərdikləri fədakarlıq şagirdlərimizin vətənpərvərlık hissini daha da artırır.  Azərbaycanın Milli Qəhrəmanı Vahid Quliyev, Fariz Qəhrəmanovla, igidliyi ilə adı əfsanəvi qəhrəman kimi dillər əzbəri olmuş Qarabağ müharibəsi qəhrəmanı İbad Hüseynovla görüş şagirdlərin mənəvi inkişafında əxlaqi – tərbiyəvi rol oynamışdır. Məktəblilər əsər, film qəhrəmanları ilə deyil, həqiqi, real müasirləri ilə üz – üzə dayanırlar.  Bu da onların bir gələcək qurucusu kimi, xalqın mənafeyini qoruyacaq bir insan kimi formalaşmasında böyük əhəmiyyət kəsb edir. 

Məktəbdə keçirilən digər tədbir yazıçı Elxan Elatlının “Qisas gecəsi” kitabının təqdimatı oldu. Bu təqdimat sanki döyüşə hazır dayanan igid Azərbaycan əsgərlərinin hazırlığını göstərirdi. Milli Qəhrəman Mübariz İbrahimova həsr olunmuş bu kitabın hər səhifəsini diqqətlə, qürurla, məhəbbət və sevgi ilə oxuyan şagidlər Mübariz həyatının davamını onlar yaşayacaqlarını tədbirdə öz çıxışlarında nümayiş etdirdilər. Bu fədakarlıq, Vətən naminə xalq sevgisinin bəşəriliyi deyilmi? Şagidlər üçün onlar əsl örnək, əsl məktəb, əsl həyat dərsləridir.

Məktəb günün nəbzi ilə işləyir. Çünki  məktəb kollektivinin bir amalı var: hərtərəfli inkişaf etmiş, müasir bilik və bacarıqlara yiyələnmiş, Vətənini sevən, onun yolunda canından belə keçməyə hazır olan vətəndaş yetişdirmək! Bunun üçün də  məktəb rəhbərliyinin qayğısı və təşəbbüskarlığı sayəsində bütün kollektiv vəzifə və borclarını layiqincə yerinə yetirirlər. Heç bir tarixi, ictimai hadisə məktəb kollektivinin nəzərindən kənarda qalmır. Şagirdlər 20 Yanvar hadisələrini, Xocalı faciəsini əks etdirən divar qəzetlərində, tarixi yerlərə  ekskursiyalarda, bədii anim gecələrində də eyni bir ruhu – Vətənə layiqli övlad olmalıyıq fikrini təbliğ edirlər.

Məktəbdə və məktəbdənkənar tədbirlərdə - “Şahin”, “Vətənin müdafiəsinə hazıram”, 20 Yanvar  hadisələrinə həsr olunmuş rəsm sərgilərində , “ Odlar Yurdu – Azərbaycan” rəsm müsabiqəsində 129№li tam orta məktəb öz sözünü demişdir. Şagirdlərin hər birinin əl işində, çəkdikləri rəsmlərdə, istifadə etdikləri boyalarda Vətən eşqi, Vətən sevgisi duyulur. Bölünməz  Azərbaycanın gələcək vətənpərvər  övladları öz hislərini “Azərbaycan – Biz həmişə səninləyik!” şüarı ilə keçirilən bilik yarışmasında da bir daha sübut etdilər. Məktəbdə keçirilən layihələrdən biri də şagirdlərə “Tanıyaq Azərbaycanı” adı ilə təqdim olundu. Məktəb rəhbərliyinin tövsiyə və göstərişləri, müəllimlərin təşəbbüskarlığı, şagirdlərin bacarıq və vərdişləri, həvəslə çalışmaları sayəsində bu tədbir də yüksək nəticələrlə başa çatdı.

Nizami rayonunda keçirilən Gül bayramında şagirdlərimizin əl işlərindən ibarət sərgi ən nümunəvi, rəngarəng rəsm qalereyasını xatırladırdı. Məktəblilərin belə həvəslə, səylə, sevgi ilə yaratdıqları hər bir nümünə Vətən gözəlliklərinin canlı əksidir.

Biz müəllimlər şagirdlərimizin ugurlarını gördükcə sevinirik ki, gələcəyimizi etibar etməyə layiqli varislərimiz var. Əgər biz onların qəlblərində Vətən sevgisinin ən azından bir damlasını yarada bilmişiksə, deməli, bu damlalar ümmana çevriləcək. Elə bir ümmana ki, daim Azərbaycan adını öz axarı ilə aparacaq, onun sərhədlərinin toxunulmazlığını təmin edəcək. Elə bir ümman ki, coşub – daşıb yad, mənfur düşmənləri sularında məhv edəcək. Elə bir umman ki, dünyaya sülh, əmin –amanlıq carçısı kimi nur paylayacaq.

Bizə – 129№li məktəbin kollektivinə də şagirdlərinin bu ümmanından pay düşəcək və fəxr edəcəyik ki, çəkdiyimiz əziyyət, göstərdiyimiz fədakarlıq cavabsız qalmayıb. Bu cavab isə müasir dünyamızın quruculugunda çalışacaq, vətənpərvərlik ruhunda böyüyəcək 129 №li məktəbin şagirdlərinin Vətən qarşısında borclarını dərk edib yerinə yetirməkləri olacaq!