Vətənpərvərlik ruhu

Mehriban MƏMMƏDOVA,                                                                  

129№-li Məktəbin Azərbaycan  dili və ədəbiyyat müəllimi

 Yeniliklərə daim açıq olan 129№-li tam orta məktəb rəhbərlik başda olmaqla, təhsildəki yeniliklərə sevə-sevə qoşulur. Məktəbimizdə mütəmadi keçirilən idman (dama, şahmat və s.), bilik yarışları (müxtəlif fənnlər üzrə), şagirdlərin ayrı-ayrı müsabiqələrdə, respublika əhəmiyyətli tədbirlərdə iştirakı onların dünyagörüşünün artmasında müstəsna rol oynayır. Məktəbimizdə ölkəmiz üçün əhəmiyyətli olan tarixi günləri əks etdirən divar qəzetləri, bülletenlər buraxılır, disputlar keçirilir.       Bu il “Tarixi ərazilərimizi tanıyaq” devizi altında Şəki, Lənkəran, Naxçıvan,  Quba və digər bölgələrimizin tarixi keçmişi, bu günü, adət-ənənələri, milli mətbəxi, milli geyimləri haqqında 6-cı sinif şagirdləri məlumatlar toplamış, tədbir iştirakçılarına təqdim etmişlər. Eyni qaydada 7-ci sinif şagirdləri isə şairlərimiz, yazıçılarımız haqqında məlumatlar əldə etmiş, maraqlı kompozisiya hazırlamışlar.

Təqvimdə önəmli olan günlərimiz məktəb foyesində şagirdlərin öz əl işləri, çəkdikləri rəsmlər, düzəltdikləri fiqurlar, yazdıqları məqalələr şəklində sərgilənir. Təhsildə mütaliənin xüsusi yeri, önəmi olduğunu əsas tutaraq məktəb foyesində vaxtaşırı kitab sərgiləri təşkil olunur. Kitabxananın müdiri Ülkər Əmiraslanova şagirdlərə kitablar haqqında maraqlı məlumatlar verir. Şagirdlərin təlim və tərbiyəsi bütün məktəb kollektivinin əsas vəzifəsidir.       Biz müəllimlər başa düşürük ki, hər şeydən öncə vətənpərvər şagird hazırlamalıyıq.                                                      

Bu sahədə bizim Azərbaycan dili və ədbiyyat müəllimlərinin xüsusi yeri var.  Ana dilimizi şagirdlərə sevdirmək, onun qorunmasında bütün incəliklərini şagirdlərə çatdırmaq üçün əlimizdən gələni əsirgəmirik. Şair və yazıçılarımızın ibrətamiz həyat yolunu, onların əsərlərindəki vətənpərvərlik ruhunu gələcək gənc nəslə aşılamaq bizim əsas borcumuzdur. Bu yaxınlarda “Ana dilimiz-mənəviyyatımızdır” adlı geniş tədbir keçirdik. Bütün ədəbiyyat müəllimlərinin birgə hazırladığı bu tədbir məktəb rəhbərliyi və digər müəllim və şagirdlər tərəfindən rəğbətlə qarşılandı.   Siddiqə Rüstəmovanın hazırladığı “Əlibəy Hüseynzadə-150” adlı tədbir çox maraqlı keçdi. Ensiklopedik biliyə malik olan bu şəxsiyyətin həyatı və fəaliyyəti şagirdlərə böyük məhəbbətlə çatdırıldı.

Sevda Alıyeva və  Svetlana Əmirovanın “İlyas Əfəndiyev-100” adlı tədbiri gözəl Qarabağımızı, onun füsunkar təbiətini, istedadlı insanlarını bir daha gözümüz qarşısında canlandırdı. İlyas Əfəndiyevin “Xurşudbanu Natəvan” əsərindən götürülən səhnəcik isə tamaşaçıları həm kövrətdi, həm də qurur hissini artırdı. Tədbir təşkilatçılarının əslən Qarabağdan olması bu mövzuya çox həssaslıqla yanaşmalarından hiss olunurdu.    

Hər bir Azərbaycanlının qurur mənbəyi doğma vətənimiz, maddi və mənəvi sərvətimiz, tariximiz, keçmişimiz, gələcəyimizdir. Bütün bunların mərkəzində dahi şəxsiyyət, işıqlı düha, xalqın xilaskarı Heydər Əliyev dayanır. Bu şəxsiyyətə olan böyük sevgimə rəğmən onun adına layiq olan bir təqdimat keçirməyi qərarlaşdırdım. “Mən Azərbaycanlıyam” adlı bu sujetli təqdimatda şagirdlər çox böyük fəallıq göstərdilər. Səslənən şeirlər, mahnılar, mühazirələr Heydər Əliyev haqqında dahi insanların fikirləri, Ulu Öndərin özünün dilindən səslənən aforizmlər hər kəsin maraq və rəğbətinə səbəb oldu. İstedadlı şagirdimiz Elroman Əlizadənin dahi rəhbərə həsr etdiyi “Ulu Öndər” şeiri çox təsirli idi.

  Təqdimatın sonunda məktəbimizin direktoru Samir Mehdizadənin çıxışı maraqlı fikirlərlə yadda qaldı. O şagirdlərə çatdırdı ki, sözdə hər kəs vətənpərvər ola bilər, amma Heydər Əliyev əməldə vətənpərvər olan dahi şəxsiyyətdir.

 Hər il müəllimlərimiz tərəfindən keçirilən “Xocalı faciəsi”nə, “20 Yanvar” faciəsinə və digər önəmli günlərimizə aid tədbir və təqdimatlar müəllim kollektivimizin əsl vətənpəvər ruhda olduğundan xəbər verir. Belə kollektivi olan məktəbin şagirdləri də demək ki, etibarlı əllərdədir.