Zəngin ideyalar məktəbi

Hələ ötən il Bakının Nizami rayonundakı 129 nömrəli tam orta məktəbin fəaliyyətinə həsr

 olunmuş xüsusi buraxılış hazırlayarkən məktəbin işi ilə yaxından tanış olmuş, bu təhsil ocağının  direktoru Samir Mehdizadənin rəhbərliyi ilə yeniliklərin, mütərəqqi ideyaların meydanına çevrildiyinin şahidi olmuşdum. Düşünmüşdüm ki, burada həyata keçirilən hər bir tədbirin, fəaliyyətin əsasında pedaqoji işə, məktəbşünaslığa dərindən bələdlilik, eyni zamanda, işə sonsuz məhəbbət dayanır. Ötən bir il ərzində düşüncələrimdə həqiqətən də yanılmadığımın şahidi oldum. 129 nömrəli tam orta məktəb Samir Mehdizadənin rəhbərliyi ilə 2014-2015-ci dərs ilində də maraqlı ideyalara dəstək vermək, onların həyata keçirilməsinə ev sahibliyi etmək, hətta Azərbaycan təhsilini xaricdə təmsil etmək kimi mühüm tədbirlərə qoşuldu.

Məktəbdə Təhsil Şurasının genişləndirilmiş iclası keçirildi

Təhsil Şurası məktəbin iş təcrübəsini respublikaya yaydı

Ötən ilin may ayında Azərbaycan Təhsil Şurasının məktəbdə keçirilən genişləndirilmiş iclası da məktəbin tarixinə əlamətdar hadisə kimi yazıldı. İdarə heyətinin genişləndirilmiş iclasının 129 nömrəli tam orta məktəbdə keçirilməsinin əsas məqsədi təhsil ocağının iş təcrübəsi ilə tanış olmaq, novatorluğu, müasirliyi respublikaya yaymaq idi. Həmin gün təhsil ocağının qonaqları arasında Şuranın sədri, Rusiya Pedaqoji və Sosial Elmlər Akademiyasının həqiqi üzvü, pedaqoji elmlər doktoru, professor Əjdər Ağayev, idarə heyətinin üzvləri – Bakı Pedaqoji Kadrların İxtisasartırma və Yenidənhazırlama İnstitutunun rektrou, professor Asəf Zamanov, Bakı Musiqi Kollecinin direktoru, professor Nazim Kazımov, veteran müəllim Həqiqə Məmmədova, “Təhsil və zaman” qəzetinin redaktoru Böyükağa Mikayıllı, 164 nömrəli tam orta məktəbin direktoru Kəmalə Qədirova, “Ən yaxşı müəllim” müsabiqəsinin qalibi Sevinc Niftiyeva və digərləri var idi. Genişləndirilmiş iclasın iştirakçıları öncə təhsil ocağında tədris prosesi ilə tanış oldular. İclasın gündəliyində dayanan birinci məsələ məktəbin direktoru Samir Mehdizadənin məruzəsi idi. Samir Mehdizadə məruzəsində məktəbdə son illər ərzində həyata keçirilmiş tədbirlər barəsində genişlyi ilə bəhs etdi. Söylədi ki, məktəbdə tədrisin keyfiyyətinin yüksəldilməsi, təlim-tərbiyə işinin müasir dövrün tələbləri səviyyəsində qurulması, müəllimlərin işə ciddi münasibətinin təmin edilməsi ilk günlərdən bir nömrəli vəzifə kimi qarşıda dayanmışdır. O, bildirdi ki, bir neçə il əvvəl məktəbin maddi-texniki bazası çox zəif idi. Bu da öz növbəsində təlim prosesini dövrün tələbləri səviyyəsində təşkil etməyə imkan vermirdi.  Odur ki, ilk növbədə məktəbin maddi-texniki bazasının mövcud durumu öyrənildi. Məlum oldu ki, pedaqoji prosesi müasir tələblər səviyyəsində təşkil etmək üçün məktəbin maddi-texniki bazasının möhkəmləndirilməsinə ciddi ehtiyac duyulurdu. Məktəbin istilik sistemi yox dərəcəsində idi. İdman zalından istifadə etmək mümkün deyildi. Ümumən, məktəbin ciddi təmirə ehtiyacı var idi. Təbii ki, bu kimi çatışmazlıqları aradan qaldırmadan yüksək təlim keyfiyyətlərinə nail olmaq çox çətin olacaqdı. Samir Mehdizadə vurğuladı ki, Bakı şəhəri üzrə Təhsil İdarəsinin yaxından köməkliyi sayəsində maddi-texniki baza sahəsində çətinliklər aradan qaldırıldı. Məktəbin internet şəbəkəsinə qoşulması təmin olundu. Bakı şəhəri üzrə Təhsil İdarəsi tərəfindən məktəbə  “Kimya”, “Fizika”, “Biologiya” fənninin tədrisi üçün lazım olan əyani vəsaitlər, eləcə də kompyüterlər, proyektor, printer, elektron yazı lövhələri, idman ləvazimatları gətirildi.  

Samir Mehdizadə qeyd etdi ki, məktəbdə təlim prosesinin yüksəldilməsində pedaqoji kollektivin öz işinə intizamlı, ciddi yanaşması əsas şərtlərdəndir. Nə yaxşı ki, 129 nömrəli tam orta məktəbdə belə müəllimlər çalışır. S.Mehdizadə ümumilikdə rəhbərlik etdiyi təhsil ocağının fəaliyyətini genişliyi ilə xarakterizə etməklə, təhsil ocağının fəaliyyətinin mənzərəsini yaratdı.

Onu da qeyd edim ki, iclasda Təhsil Şurasının həyata keçirdiyi “Ən yaxşı məqalə” müsabiqəsinin qalibləri mükafatlandırıldı.  

Məktəb təcrübə mübadiləsi və əməkdaşlıq layihəsinə qoşuldu

Hələ ötən ilin iyulunda Təhsil Şurasının sədri professor Əjdər Ağayevin ideya rəhbərliyi ilə Şuranın “Təhsil müəssisələrinin təcrübə mübadiləsi və əməkdaşlıq” layihəsinin əsası qoyuldu.

Təhsil müəssisələrinə bu layihyə qoşulmaq üçün müraciət edildi. Sevindirici haldır ki, 129 nömrəli tam orta məktəb bu çağırışa cavab verən ilk məktəb oldu və biz məktəbin direktoru Samir Mehdizadə ilə birlikdə əməkdaşlıq haqqında memorandum imzalamaq üçün Şirvan şəhərindəki 1 nömrəli məktəb-liseydə olduq. Həmin təhsil ocağı ilə imzalanan memorandumla Təhsil Şurasının bu istiqamətdə fəaliyyətinin əsası qoyuldu. Onu da qeyd edim ki, Samir Mehdizadə bu müqavilənin imzalanmasında yalnız 129 nömrəli tam orta məktəbin direktoru kimi deyil, eyni zamanda Təhsil Şurasının idarə heyətinin üzvü kimi çıxış edirdi. İmzalama mərasimində Şirvan Şəhər Təhsil Şöbəsi metodkabinetinin direktoru Elçin Həsənov, şəhər 1 nömrəli məktəb-liseyin direktoru Rəfiqə Atayeva, Təhsil Şurası İdarə Heyətinin üzvü, “Təhsil və zaman” qəzetinin redaktrou Böyükağa Mikayıllı, Təhsil Şurası İdarə Heyətinin üzvü, “Ən yaxşı müəllim” respublika müsabiqəsinin qalibi Sevinc Niftiyeva iştirak etdilər. Mərasimdə çıxış edən Samir Mehdizadə vurğuladı ki, təhsil müəssisələrinin əməkdaşlıq şəraitində fəaliyyət göstərməsi məktəbdə tədrisin keyfiyyətinin yüksəldilməsinə təsir edən ən mühüm amillərdəndir. Bu gün 129 nömrəli tam orta məktəbin fəaliyyətinin öyrənilməli tərəfləri çoxdur. “Amma bizim özümüzün də öyrənməyə ehtiyacımız var” deyən Samir Mehdizadə Şirvan şəhər 1 nömrəli məktəb-liseylə əməkdaşlıqdan yalnız fayda götürəcəklərini dilə gətirdi. Bundan sonra 129 nömrəli tam orta məktəb anoloji layihəni Bakının Xəzər rayonundakı 230 nömrəli tam orta məktəblə də imzaladı. 230 nömrəli tam orta məktəbdə memorandumun imzalanması mərasimində Azərbaycan Təhsil Şurasının sədri professor Əjdər Ağayev də iştirak etdi. Əməkdaşlıq müqaviləsinin imzalanması mərasimində çıxış edən professor Əjdər Ağayev ümumilikdə Təhsil Şurasının son vaxtlar həyata keçirdiyi tədbirlərdən bəhs etdi. Bildirdi ki, “Təhsil müəssisələrinin əməkdaşlıq və təcrübə mübadiləsi layihəsi” təhsilimizin bu günü və gələcəyi üçün mühüm olan bir layihədir. Təhsil müəssisələri arasında əməkdaşlıq layihələri illər öncə mövcud olmuşdur. Amma son illər bu tendensiya unudulmuşdur. Halbuki, məktəblər əməkdaşlıqdan çox fayda əldə edə bilərlər. Əjdər Ağayev vurğuladı ki, Təhsil Şurası bu layihəni mətbuatda elan etdikdən sonra xeyli sayda məktəb əməkdaşlıq üçün müraciət edib. Dərs ili başladıqdan sonra bu layihənin daha geniş dairədə reallaşmasına başlanacaq.

Samir Mehdizadə də professor Əjdər Ağayevin fikirləri ilə həmahəng düşündüyünü dilə gətirərək layihənin əhəmiyyətindən bəhs etdi. Memorandumun ayrı-ayrı maddələrini iştirakçıların diqqətinə çatdırdı. Qeyd etdi ki, bu layihə özlüyündə məktəbin bütün pedaqoji kollektivini, şagirdləri əhatə etməklə, təcrübə, informasiya mübadiləsi aparmağa, konfransların, seminarların, idman və bilik yarışlarının keçirilməsinə, elmi müzakirələrin təşkilinə və s. xidmət edir. Şübhəsiz ki, bu, öz növbəsində təhsil müəssisəsinin hərtərəfli inkişafını stimullaşdırmağa yönəlib.

230 nömrəli tam orta məktəbin direktoru Elşən Qafarov da rəhbərlik etdiyi təhsil ocağının belə bir əhəmiyyətli layihəyə qoşulmasından məmnunluq ifadə etdi. O, rəhbərlik etdiyi məktəbin ənənələrindən, nailiyyətlərindən danışdı. Söylədi ki, bu gün məktəbdə zamanın tələbləri səviyyəsində tədbirlər həyata keçirilir. Sevindirici haldır ki, məktəbin maddi-texniki bazası, pedaqoji kollektivin intellektual hazırlığı da buna imkan verir. O, ümidvar olduğunu bildirdi ki, 129 nömrəli tam orta məktəblə əməkdaşlıq məktəbin fəaliyyətində daha yeni istiqamətlərin açılmasına imkan yaradacaq.  

Məktəb elmi-təcrübi konfranslara qoşuldu

Samir Mehdizadənin və rəhbərlik etdiyi məktəbin pedaqoji kollektiv üzvlərinin qoşulduğu layihələrimizdən biri də ötən ilin sentyabrında İmişlidə keçirilən “Təlim keyfiyyətinin yüksəldilməsi problemi” mövzusunda elmi-təcrübi konfrans oldu. Samir Mehdizadə bu konfransda da maraqlı çıxışla diqqət mərkəzinə gəldi. Təcrübəli məktəb rəhbəri bu tədbirdə “Təlim keyfiyyətinin yüksəldilməsində məktəblərarası əməkdaşlıq və təcrübə mübadiləsinin təlimin keyfiyyətinin yüksəldilməsində” rolu mövzusunda çıxış etdi. Əslində bu mövzu Samir müəllimlə birlikdə müəyyənləşdirdiyimiz və sistemli olaraq keçirdiyimiz layihələrin və elmi-təcrübi konfransların tərkib hissəsinə daxil idi. Bu mövzu gələcəkdə genişləndirilmiş şəkildə Gürcüstanda keçirəcəyimiz beynəlxalq elmi-təcrübi konfransda da gündəmə gələcəkdi.

Beynəlxalq elmi-təcrübi konfransda

Qeyd etdiyim kimi, 129 nömrəli tam orta məktəb ötən il Təhsil Şurasının həyata keçirdiyi bütün layihələrin fəal iştirakçısı olmuş, bəzi hallarda isə təşkilati işlərə yaxından qoşulmuşdur. Belə layihələrdən biri də Təhsil Şurasının Gürcüstanın Kobuleti şəhər bələdiyyəsi ilə birgə Kabuleti şəhərində keçirdiyi və Gürcüstan Respublikasının Acarıstan Muxtar Respublikası Təhsil Nazirliyinin də qatıldığı “Beynəlxalq təcrübə mübadiləsi təlim keyfiyyətini yüksəldən vasitə kimi” elmi-təcrübi konfrans oldu. Samir Mehdizadə beynəlxalq elmi-təcrübi konfrans ideyasını ilk dəstəkləyənlərdən olmaqla, istər Azərbaycanda, istərsə də Gürcüstanda təşkilati işlərdə bizə yaxından kömək etdi. Konfransın təşkilat komitəsinin və elmi heyətinin üzvü oldu. Konfransdakı “Beynəlxalq təcrübə mübadiləsinin təlimin keyfiyyətinin yüksəldilməsində rolu” mövzusunda çıxışında maraqlı fikirlər irəli sürməklə, iştirakçıların diqqətini cəlb etdi. 

Mənəvi tərbiyə əsas məsələlərdən biri kimi

Məktəbdə şagirdlərin mənəvi tərbiyəsi həmişə prioritet məsələlərdən bir olmuşdur. Samir Mehdizadə qeyd edir ki, həyata keçirilən çoxsaylı tədbirlərin məqsədi uşaqların dünyagörüşünün formalaşdırılması, onların şəxsiyyət kimi yetişdirilməsi istiqamətində ilkin addımların atılması, gənclərin müstəqil həyata hazırlanması məqsədi daşıyır. Belə tədbirlər məktəbdə sistemli olaraq keçirilməkdədir. Tanınmış şairlər, yazıçılar, elm, sənət adamları ilə məktəbdə görüşlərin təşkil olunması ənənəvi hal alıb. Samir Mehdizadə bu kimi tədbirləri reallaşdırmaqla, cəmiyyət-məktəb əlaqələrinin inkişafına, böyüyən nəslin cəmiyyətdə, elm aləmində gedən proseslərdən xəbərdar olmalarına, gələcək həyat yollarının müəyyənləşdirilməsində onlara yardımçı olmaq məqsədi daşıyır. Yeri gəlmişkən, Samir Mehdizadənin ideyası ilə məktəbdə reallaşan bir layihə barəsində də bəhs etmək istərdim. Layihəyə əsasən məktəbin pedaqoji kollektivinin üzvləri əlaçı və nümunəvi şagirdlərinin evlərinə qonaq gedir, onların valideynləri, ailə mühiti, tədris şəraiti ilə tanış olurlar. Şagirdlərin ailələri ilə tanışlıq məktəb-ailə əlaqələrinin inkişafına xidmət etməklə, şübhəsiz ki. şagirdlərin təlimə marağının artırılmasında, məsuliyyət hissinin yüksəldilməsində müstəsna rol oynayır. Samir Mehdizadənin sözlərinə görə gələn ildən layihənin daha geniş dairəni əhatə edəcəyi gözlənilir.  

Qeyd etdiyim kimi, 129 nömrəli tam orta məktəbdə bir-birindən maraqlı tədbirlərin, intellektual yarışların, ekskursiyaların, görüşlərin keçirilməsi sistemli hal alıb. Samir Mehdizadənin bu tədbirlərindəki çıxışlarından, mətbu yazılarından belə bir nəticəyə gəlmişəm ki, o, bu kimi tədbirləri pedaqoji-mənəvi mahiyyətini nəzərə alaraq həyata keçirməyə çalışır. Qeyd edir ki, şagirdlərin dünyagörüşünün formalaşması, onların hərtərəfli vətəndaş kimi cəmiyyətə təqdim edilməsi bu gün məktəbin qarşısında dayanan ən vacib məsələdir. Biz bu gün gənclərimizin intellektual hazırlığı ilə yanaşı, mənəvi hazırlığına da ciddi fikir verməliyik. Mənəvi cəhətdən hazırlıqlı olmayan gənc intellektual baxımdan nə qədər savadlı olsa da cəmiyyətə lazımı səviyyədə fayda verə bilməz.  

Sevindirici hal həm də odur ki, 129 nömrəli tam orta məktəbin təşəbbüsü ilə keçirilən bu tədbirlər əksər hallarda Bakının digər məktəblərini də əhatə etməklə, daha geniş dairədə reallaşır. Keçirilən belə tədbirlərdən biri “İntellekt olimpiadası” idi. Bu tədbir Azərbaycan Respublikasının Prezidenti yanında Gənclər Fondunun dəstəyi ilə reallaşmaqla, Bakının Nizami və Xəzər rayonlarının 32, 61, 62, 129, 214, 229, 238  və 230, eləcə də Şirvan şəhər 1 nömrəli məktəb-liseyini əhatə etdi. Yarışın birinci turunda 32 nömrəli məktəbin komandası qalib gəldi. 2-ci yeri 61 nömrəli məktəb, 3-cü yeri isə 230 nömrəli məktəbin şagirdləri  tutdular. Qalib komandalar kubok və fəxri fərmanlarla təltif edildilər. Qalib komandanın üzvləri Elnur Dadaşov, Sadiq Abdullayev, Vüsalə Quliyeva, Elşad İbrahimov və Elroman Əlizadə idilər.

“İntellekt olimpiadası”nın növbəti yarışı Bakının Nizami rayonundakı 61 nömrəli tam orta məktəbdə keçirildi. Bakının Nizami rayonunun məktəblərinin və Şirvan şəhər 1 nömrəli məktəb-liseyin şagirdlərinin iştirak etdiyi yarış gərgin mübarizə şəraitində keçdi. Bu yarışda Bakı şəhəri 129 nömrəli məktəbin komandası qalib gəldi. 2-ci yeri 61 nömrəli məktəb, 3-cü yeri isə 32 nömrəli məktəblər tutdular. Qalib komandalar kubok və fəxri fərmanlarla təltif edildilər.

Mütaliə vərdişlərinin təkmilləşdirilməsi diqqət mərkəzində

Yola salmaqda olduğumuz dərs ilində məktəbdə diqqəti cəlb edən tədbirlərdən biri də Təhsil naziri cənab Mikayıl Cabbarovun "Mütaliə vərdişlərinin təkmilləşdirilməsi və mütaliə mədəniyyətinin formalaşdırılması" haqqında əmrinin icrası məqsədilə pedaqoji elmlər doktoru, professor Əjdər Ağayevin kiçik yaşlı uşaqlar üçün yazdığı "Pişik balasının səhvi" əsərinin səhnələşdirilmiş təqdimatının keçirilməsi oldu. Təqdimatda Azərbaycan Təhsil Şurasının sədri professor Əjdər Ağayev, Şuranın idarə heyətinin üzvləri Həqiqə Məmmədova, İslam Baxşıyev, Akif Orucov, Böyükağa Mikayıllı, Yusif Əliyev, mətbuat nümayəndəsi Eldəniz Abbasov iştirak edirdilər.  Məktəbin 3-cü sinfinin rəhbərləri Elmira Hüseynova və Seçmə Canmirzəyevanın təşkilatçılığı ilə hazırlanan təqdimatı giriş sözü ilə açan məktəbin direktoru Samir Mehdizadə bildirdi ki, onlar professor Əjdər Ağayevin yaradıcılığına təsadüfi müraciət etməyiblər. Əjdər Ağayevin  çoxşaxəli yaradıcılığında uşaqlar üçün yazdığı şeirlər, hekayələr mühüm yer tutur. Əjdər Ağayev Azərbaycan pedaqoji fikrinin görkəmli nümayəndəsi olmaqla bərabər, müasir Azərbaycan uşaq ədəbiyyatında da şair, nasir kimi özünəməxsus yeri ilə tanınır.

Samir Mehdizadə vurğuladı ki, Təhsil naziri cənab Mikayıl Cabbarovun şagirdlərin mütaliəsinin təkmilləşdirilməsi istiqamətində imzaladığı əmr 129 nömrəli tam orta məktəbdə də əks-səda verib. Məktəbdə şagirdlərin mütaliə imkanlarının yaxşılaşdırılması üçün tədbirlər planı hazırlanmış, sistem yaradılmışdır. Bu günkü tamaşa da həmin tədbirlər planının bir hissəsidir. S.Mehdizadə onu da qeyd etdi ki, məktəbdə tamaşaların təşkil edilməsi, şagirdlərin tamaşalarda iştirak etməyə meyl göstərməsi onların mədəni, intellektual cəhətdən inkişafında, dünyagörüşünün formalaşmasında mühüm rola malikdir. O, onu da vurğuladı ki, tamaşanın ərsəyə gəlməsində valideynlərin də yaxından köməkliyi olmuşdur. Yeri gəlmişkən qeyd edim ki, məktəbdə əsası bir neçə il əvvəl qoyulmuş valideyn-məktəb əlaqələri bu gün də intensiv şəkildə davam edir. Keçirilən mütəmadi görüşlər, maarifləndirici tədbirlər valideynlərin diqqətini cəlb etməklə, onların marağına səbəb olur. Samir Mehdizadə qeyd edir ki, valideyn-məktəb əlaqələri təhsil ocağının fəaəlyyətinin ən mühüm tərkib hissəsidir. Tədrisin keyfiyyətinin yüksəldilməsinin əsasında dayanan bu amili nəzərdən kənarda saxlamaq olmaz.

Vətənpərvərlik tərbiyəsi diqqət mərkəzində

Bu gün 129 nömrəli tam orta məktəbdə qarşıda dayanan ən mühüm vəzifələrdən biri də şagirdlərin vətənpərvər ruhda tərbiyə olunmasıdır. Bu vəzifənin həyata keçirilməsi istiqamətində sistemli iş aparıldığını deyən Samir Mehdizadə bu istiqamətdə məktəbdə keçirilən tədbirlərə diqqətimizi yönəldir. 20 Yanvar, Xocalı faciəsi, 31 mart Azərbaycanlıların sosqrımı günü, 31 Dekabr Dünya Azərbaycanlılarının Həmrəylik günü və digər tarixi günlər məktəbin iş planının əsasını təşkil etməkdədir. Qarabağ döyüşlərində böyük şücaət göstərərək adını Azərbaycanın qəhrəmanlıq tarixinə yazmış İbad Hüseynovla məktəbdə keçirilən görüş şagirdlərin yaddaşına həkk olunmuşdur. Görkəmli döyüşçü ilə görüşdən məmnun qalan məktəbin pedaqoji və şagird kollektivi qərəmanı onun adına layiq qarşılamış, maraqlı kompozisiya nümayiş etdirmişlər. İbad Hüseynov keçdiyi şərəfli döyüş yolundan danışmış, şagirdləri maraqlandıran sualları cavablandırmışdır. Qatı erməni terrorçusu Monte Melkonyanı məhv etmiş “Azərbaycan Bayrağı” ordenli İbad Hüseynovun  gənclərlə canlı ünsiyyəti mühüm tərbiyəvi əhəmiyyətə malikdir. Belə görüşlərdən biri də Qarabağ uğrunda döyüşlərdə misilsiz şücaətlər göstərmiş, düşmənə sarsıdıcı zərbələr endirmiş Azərbaycanın Milli Qəhrəmanı Fariz Qəhrəmanovla keçirilmişdir.

Tanınmış yazıçı Elxan Elatlının Azərbaycanın Milli Qəhrəmanı Mübariz İbrahimova həsr etdiyi “Qisas gecəsi” kitabının ictimai müzakirəsi də məktəbdə böyük rezonans doğurmuşdur.  Tədbirdə kitabın müəllifi yazıçı Elxan Elatlı da iştirak edirdi.  Dövlət himni oxunduqdan sonra şagirdlər Mübariz İbrahimovun qısa, lakin şərəfli ömür yoluna həsr edilmiş kitabdan aldıqları təəssüratları danışdılar. Şagirdlər milli qəhrəman Mübariz İbrahimov kimi vətənpərvər olacaqlarına, Vətəni sonsuz məhəbbətlə sevəcəklərinə, işğal altında olan doğma torpaqlarımızın düşməndən azad edilməsinə hazır olduqlarına söz verdiər. Yazıçı Elxan Elatlının da Mübariz İbrahimov haqqında fikirləri şagirdlər üçün maraqlı oldu.  Daha sonra tanınmış yazıçı şagirdləri maraqlandıran sualları cavablandırdı.

Məktəbdə diqqəti cəlb edən məqamlardan biri də həyata keçirilən intellektual yarışların, ədəbi-bədii kompozisiyaların da məzmununun, süjet xəttinin milli-mənəvi dəyərlərlə, vətənpərvərlik hissləri aşılayan ideyalarla zənginləşdirilməsidir. “Azərbaycan, biz həmişə səninləyik”, “Biz fəxr edirik ki, Azərbaycanlıyıq”, “Bölgələrimizi tanıyaq”, “Vətənin müdafiəsinə hazırıq” mövzusunda ədəbi-bədii kompozisiyalar, rəsm sərgiləri buna misal ola bilər. Bu tədbirlərdə şagirdlər Azərbaycanın görkəmli şəxsiyyətləri, tarixi abidələri, maddi-mədəniyyət nümunələri, təbiəti, ekologiyası incəsənəti, mətbəxi ilə tanış olur, mahnılar, şeirlər, rəqs nümunələri nümayiş etdirirlər. Milli ruhun, mənəvi dəyərlərin aşılanması pedaqoji kollektivin hər bir bir üzvünün amalına çevrilib. Heydər Əliyev Mərkəzinə, Şəhidlər Xiyabanına, Xocalı Soyqrımı abidəsinə təşkil olunan ziyarətlər, görkəmli teatr və kino xadimi Leyla Bədirbəylinin və digər şəxsiyyətlərin  həyat və fəaliyyətinə həsr olunmuş təqdimatlar, tədbirlər məktəbin saf mənəvi mühitini təmin etməklə, şagirdləri gələcəyə yüksək inam ruhunda tərbiyə edir. Gənc nəslin təlim və tərbiyəsində bu, mühüm amildir.

Böyükağa MİKAYILLI