8 nömrəli tam orta məktəbdə görüş

Professor Əjdər Ağayevin çıxışı maraqla qarşılandı.

Görüşdə məktəbin əldə etdiyi uğurlardan da bəhs olundu.

Bu günlərdə Lənkəranda səfərdə olan Azərbaycan Təhsil Şurasının sədri professor Əjdər Ağayev şəhər 8 nömrəli tam orta məktəbin qonağı oldu, pedaqoji kollektivlə görüşdü, qabaqcıl dil-ədəbiyyat müəllimi Münasib Nuriyevin dərsində iştirak etdi. Professor Əjdər Ağayevin müəllimlər qarşısında “Ənənə və müasirlik” mövzusunda çıxışı maraqla qarşılandı. Əjdər Ağayev söylədi ki, bu gün təhsilimiz Azərbaycan dövləti tərəfindən yüksək səviyyədə qayğı ilə əhatə olunub. Ölkə başçısı cənab İlham Əliyevin təhsilimizin inkişafına ünvanlanmış fərman və sərəncanları, yeni məktəb binalarının inşa olunması, müasir avadanlıqlarla təchizat, Heydər Əliyev Fondunun Prezidenti Mehriban xanım Əliyevanın da Fondun xətti ilə təhsilimizin inkişafına yönəlmiş geniş miqyaslı tədbirləri təhsilimizə yeni ab-hava gətirmişdir.

O, çıxışında vurğuladı ki, bəzən müasir dərs anlayışını tez-tez işlədirlər. Amma dərs bütün zamanlarda müasir olub. Mən 56 ildir ki, müəlliməm. Və 56 ildir ki, müasir dərs ifadəsini işlədirəm. Dövr, zaman dərsi də öz tələblərinə uyğun formalaşdırır. Dərs həmişə təkmilləşib, yeniləşib, müasir səciyyə daşıyıb. Bizim orta məktəblərdə dərs dediyimiz 1960-1970-ci illərdə dərs prosesində texniki təlim vasitələrindən istifadə olunardı, indi isə onları informasiya-kommunikasiya texnologiyaları əvəz edib. Əslində inkişaf edən budur. Odur ki, müəllim İnformasiya-Kommunikasiya Texnologiyalarını, eləcə də ingilis, rus dilini bilməlidir. Ona görə ki, bu, onun dünyaya çıxması, dərsini müasir tələblər səviyyəsində qurması üçün stimul yaradacaq. Sevindirici haldır ki, bu gün bizim belə müəllimlərimiz az deyil.

Əjdər Ağayev vurğuladı ki, bu gün müəllimlərə yeni təlim metodları kimi təqdim olunan “Əqli hücum”, “Rollu oyunlar” və s. əslində bizim təhsil sistemimizdə zaman-zaman mövcud olmuş və müəllimlər ondan bəhrələnmişlər. Uzun illər Azərbaycanın Maarif naziri vəzifəsində işləmiş akademik Mehdi Mehdizadə özünün 1982-ci ildə çap olunmuş “Ümumtəhsil məktəblərində təlim-tərbiyə prosesinin təkmilləşdirilməsi yolları” adlı əsərində bu məsələləri, Azərbaycan təhsilinin zəngin təlim, tədris ənənələrini şərh etmişdir. Bizim təhsilimizin ənənələri, kökü var. Kökü olmadan heç bir şey inkişaf edə bilməz. Təbiətdə nə varsa, təhsildə də var. Təhsil təbiətin əksidir. Təbiət necədirsə cəmiyyət də elədir. Bizim bugünkü təhsilimiz də özünün zəngin ənənələri üzərində inkişaf edir. Həyata keçirilən çoxsaylı layihələr təhsilə yeni nəfəs gətirir.  

Əjdər Ağayev özünün orta məktəbdə müəllimlik fəaliyyəti zamanı qarşılaşdığı problemlərdən, bu problemlərdən çıxmaq üçün tətbiq etdiyi yanaşmalardan, metodlardan bəhs edərək vurğuladı ki, təlim prosesində ən yaxşı metod şəraitə uyğun tətbiq olunan və səmərə verən metoddur. Müəllim elə metod düşünüb tapmalıdır ki, həm şagirdi öyrədə, həm də tərbiyə edə bilsin. Müəllim gərək siyasi cəhətdən ayıq olsun, vətəndaş mövqeyində olsun, vətənpərvər olsun. Bizim müəllim olaraq uşaqlara sevgimiz, qayğımız olmalıdır. Mən bu gün Münasib müəllimin dərsində də müəllimin şagirdə sevgisinin şahidi oldum. Şagirdə elə yanaşmalıyıq ki, onun şəxsiyyətinin formalaşdıra bilək, onu ləyaqətli insan kimi yetişdirə bilək. Biz gərək şagirdlərimizə cəsarətli olmağı aşılayaq. Cəsarət insanda əsas amillərdəndir. Əgər bu keyfiyyət insanda çatmasa, onun vətəndaşlıq mövqeyindən danışa bilmərik. Uşaq kitab oxuyub elmə yiyələnəcək. Amma insanlıq dərsini biz müəllimlərdən almalıdır. Bu keyfiyyətlər damla-damla yaranır. Uşaqdan vaxtımızı, zamanımızı əsirgəməməliyik. Əgər uşaq vaxtından şagirdlərimizə cəsarətlilik, məntiqlilik, müstəqil düşüncə, öz sözünü demək bacarığı aşılaya bilsək, onda onların əsl vətəndaş kimi formalaşmasına nail ola biləcəyik.

Əjdər Ağayev vurğuladı ki, ən yaxşı müəllimlər Azərbaycan müəllimləridir. Biz öz genetik imkanlarımızı bilirik, həyatımızı, düşüncələrimizi, uşaqlarımızın nəyə qadir olduğunu bilirik. Bu biliklərimizdən istifadə edib gənclərimizi düzgün istiqamətə yönəltməliyik. Bu, bizim həm vəzifə, həm də vətəndaşlıq borcumuzdur.  

Görüşdə iştirak edən Təhsil Şurası Mətbuat və İctimaiyyətlə Əlaqə Mərkəzinin rəhbəri, “Təhsil və zaman” qəzetinin redaktoru Böyükağa Mikayıllı Təhsil Şurasının layihələrindən bəhs etdi. Qeyd etdi ki, 2014-cü ilin noyabr ayında təşkilat “Beynəlxalq təcrübə mübadiləsi təlim keyfiyyətini yüksəldən vasitə kimi” mövzusunda layihəsi çərçivəsində Gürcüstanın Kabuleti şəhərində beynəlxalq konfrans keçirdi. Bu ilin mart ayında isə bir qrup qabaqcıl Azərbaycan müəllimlərinin iştirakı ilə analoji konfrans Ukraynanın Lvov şəhərində Lvov Vilayət Elm və Təhsil Departamenti ilə birgə təşkil olundu. O, Bakıda Amerika Birləşmiş Ştatlarının “Qababağ Fondu” ilə ötən ilin mart ayında “Qarabağ həqiqətlərinin böyüyən nəslə çatdırılmasının elmi-metodiki məsələləri” mövzusunda  Təhsil Şurasının təşkilatçılığı ilə keçirilən beynəlxalq konfransı da xatırladaraq vurğuladı ki, bu konfrans Qarabağ həqiqətlərinin beynəlxalq aləmə çatdırılmasında müəllimlərin haqq səsi kimi ucaldı. Böyükağa Mikayıllı Təhsil Şurasının keçirdiyi “Qabaqcıl iş təcrübəsinin öyrənilməsi və yayılması” layihəsindən bəhs edərək vurğuladı ki, ötən 3 il ərzində Respublikanın ayrı-ayrı bölgələrindən olan 80 nəfərdən artıq müəllimin iş təcrübəsi layihə çərçivəsində öyrənilərək yayılmışdır. Layihə bu il də  davam etdirilir.

Məktəbin direktoru Aslan İbrahimov söylədi ki, məktəbdə müəllimlərin özünüinkişafına xüsusi diqqət yetirilir. Onlar mütəmadi olaraq inkişafyönümlü təlimlərə cəlb edilir, fəal təlim texnologiyalarının, elektron tədris resurlarının təlim prosesinə tətbiqi imkanlarına yiyələnirlər. Məktəbin peşəkar kadr potensialının, eləcə də məktəbdə yaradılmış münbit pedaqoji-psixoloji mühitin sorağı hətta qonşu rayonlara da yayılıb. Təsadüfü deyil ki, Lerik rayonundan belə şagirdlər təhsil almaq üçün bu məktəbi seçirlir. Aslan İbrahimov vurğuladı ki, yeni məktəb binasının inşa edilib istifadəyə verilməsi də məktəbə şagird axınına yol açıb. Bu gün pedaqoji kollektivin qarşısında dayanan ən mühüm vəzifə şagirdi şəxsiyyət kimi formalaşdırmaq, onların məntiq və təfəkkürlərini inkişaf etdirmək, bir sözlə, cəmiyyətə layiqli vətəndaş kimi təqdim etməkdir. Əlbəttə ki, bu çətin və şərəfli vəzifənin öhdəsindən ancaq öz işinin mahir bilicisi, vətənsevər müəllimlərlə birgə gəlmək mümkündür. Aslan İbrahimov məktəbin belə müəllimlərindən riyaziyyat müəllimi, metodbirləşmənin sədri Elnarə Əbilovanın, Ruqiyyə Mehdiyevanın,  Günel Əliyevanın, Ülviyyə Həsrətovanın, Kəmalə İbayevanın, ingilis dili müəllimi Şölə Əsgərovanın, Nərmin Cəlalovanın, Nuray Əşrəfbəylinin, Ofelya Ağayevanın, tarix müəllimi Araz Məmmədovun, Şəfiqə Qəniyevanın, fizika müəllimi Aysel Səlimovanın, dil-ədəbiyyat müəllimi Münasib Nuriyevin,  idman müəllimi İlqar Paşayevin, biologiya müəllimi Ülkər Həsənovanın, Ziqəm Abasovun, coğrafiya müəllimləri Təranə Abdullayevanın, Könül Məmmədovanın, ibtidai  sinif müəllimi –metodbirləşmə sədri Yasəmən Rzayevanın,  Vəfa İmanovanın, Könül Liftiyevanın, Şəlalə Nəhmətovanın, Rəqsanə Sadıqovanın, Uşaq Birliyi Təşkilatının Rəhbəri Fidan Məmmədovanın  adlarını çəkdi.

Hər bir uğurun əsasında peşəkarlığın dayandığını vurğulayan təcrübəli məktəb rəhbəri nailiyyətlərin ilbəil artığından məmnunluq ifadə edir. Qeyd edir ki, Lənkəranlı məzunlar arasında ilk prezident təqaüdçüsü məhz 8 nömrəli tam orta məktəbin şagirdi olub. Elmin Əbilov 662 balla Bakı Dövlət Universitetinin tətbiqi riyaziyyat fakültəsinə qəbul olmaqla rayon təhsilində ilkə imza atıb. Ümumiyyətlə, 8 nömrəli tam orta məktəbin şagirdlərinin nailiyyətləri bir qayda olaraq orta məktəb illərindən başlayır. Onlar müxtəlif müsabiqələrdə, idman və bilik yarışlarında uğurlu çıxışları ilə seçilirlər. Məktəbin adı 9-11-ci siniflərin buraxılış imtahanlarının nəticələrinə görə, bir qayda olaraq ilk onluqda qərarlaşır. Bu uğurlar, yüksək nəticələr məzunların ali məktəblərə qəbul nəticələrində də özünü göstərir. 500-dən, 600-dən yüksək balla ali məktəblərə qəbul olan şagirdlərin sayına görə də məktəb öncül yerlərdə dayanır.

Aslan İbrahimov vurğuladı ki, məktəbdə həvəsləndirici tədbirlərin ənənəvi olaraq keçirilməsi də şagirdlərin təlimə olan marağının artmasında müstəsna rol oynayır. Belə tədbirlərə misal olaraq “İlin ən yaxşı şagirdi”, “İlin ən yaxşı sinfi” nominasiyası üzrə müsabiqələri göstərmək olar. Ötən dərs ilində “İlin ən yaxşı şagirdi” nominasiyasının qalibi adına 9b sinif şagirdi Kamran Əsədov, 7a sinif şagirdi Səkinəxanım Zeynallı layiq görülmüşdür. 5b sinfi isə məktəb rəhbərliyi tərəfindən “İlin ən yaxşı sinfi” nominasiyasının qalibi seçilmişdir.

Aslan İbrahimov söylədi ki, Respublikamızın hər yerinə olduğu kimi, Lənkəranda, eləcə də 8 nömrəli tam orta məktəbdə 5 oktyabr Beynəlxalq müəllim Günü böyük təntənə ilə qeyd edildi. Bu bayram 8 nömrəli tam orta məkktəbin pedaqoji kollektivi üçün daha da əlamətdar oldu.  Məktəbin müəllimi - kreativ düşüncəli, yeni yanaşma tərzinə malik olan, müstəqil, azad  düşüncəli şagirdlər yetişdirən, ünsiyyət qurduğu şagirdlərə çevik təsir göstərmək bacarığına malik olan, məktəbdə keçirilən müxtəlif yönümlü tədbirlərin müəllifi, yaradıcı, tədqiqatçılığa meyli olan dil-ədəbiyyat müəllimi Münasib Nuriyev Lənkəran Şəhər İcra Hakimiyyətinin başçısı cənab Taleh Qaraşovun müvafiq sərəncamı ilə Fəxri fərmana layiq görüldü və qiymətli hədiyyə ilə mükafatlandırıldı. Aslan İbrahimov vurğuladı ki, bu Fəxri fərman və mükafat təkcə Münasib müəllimin deyil, bütün kollektivin əməyinə verilən dəyərdir. O, bu dəyərə görə məktəbin kollektivi adında şəhər icra hakimiyyətinin başçısına minnətdarlığını dilə gətirdi.

Aslan İbrahimov vurğuladı ki, şagirdlərin milli mənəvi dəyərlərə, tariximizə ehtiram ruhunda tərbiyə olunması  pedaqoji kollektivi düşündürən ən ümdə vəzifələrdəndir. Dünya Azərbaycanlılarının Həmrəylik günü, ulu öndər Heydər Əliyevin doğum və anım günü  münasibətilə təşkil olunan ekskursiyalar da bu məqsədin reallaşmasına xidmət edən tədbirlərdir. Bu əlamətdar gün münasibətilə məktəbin bir qrup şagirdi xalqımızın ümummilli lideri Heydər Əliyev Mərkəzində və iki dəfə Sovet İttifaqı Qəhrəmanı Həzi Aslanovun ev muzeyində olmuşlar. Şagirdlərin dahi bəstəkar Üzeyir Hacıbəyovun 130 illiyi ilə əlaqədar səhnələşdirdikləri “O olmasın, bu olsun” tamaşası məktəbdə böyük anşlaqla keçmişdir. Məktəbdə fəaliyyət göstərən “Kiçik Akademiya”nın üzvləri də tədbirlərin təşkil olunasında fəal iştirak edir.  Məktəbin şagirdləri Fövqəladə Hallar Nazirliyinin keçirdiyi tədbirlərdə də mütəmadi olaraq iştirak edib qalib olurlar.

Aslan İbrahimov məktəbin gənc “Füzulişünas”larından da böyük maraqla bəhs etdi. Söylədi ki, Lənkəran Dövlət Universitetinin məktəbdə pedaqoji təcrübədə olan tələbələrinin iştirakı ilə məktəbin şagirdləri dahi Azərbaycan şairi Məhəmməd Füzulinin həyatı və yaradıcılığı ilə bağlı tədqiqat işi aparıblar. İki həftə ərzində tədqiqatda iştirak edən məktəbin 8b sinif şagirdləri yekun olaraq işlərini geniş auditoriya qarşısında təqdim etdilər. Şagirdlərdən Ramilə Fərəczadə, Türkanə Mirzəzadə, Nərmin Bəqəlizadə, Gülməmməd Quluzadə, Lamiyə Əliyeva, Hüsey Sadıxzadə maraqlı təqdimatları ilə seçildilər.

Aslan İbrahimovun sözlərindən bəlli oldu ki, ötən dərs ilində məktəbdə görkəmli sərkərdə Səməd bəy Mehmandarovun 160 illik yubilieyinə, Ulu Öndər Heydər Əliyevin doğum gününə, Gül bayramına həsr olunmuş açıq dərslərin, 20 Yanvar, Xocalı faciəsinə, Növruz bayramına həsr olunmuş tədbirlərin keçirilməsi də şagirdlərin mənəvi dəyərlərə sahiblik hissinin formalaşmasına xidmət edirdi.

Məktəbin gələcək hədəflərindən bəhs edən Aslan İbrahimov bildirdi ki, onlar məktəbin  şagirdlərinin fənn  olimpiadanın  respublika turunda layiqli yer tutmasına çalışırlar. Məktəbin valideynlər və ictimaiyyat içərisində nüfuzunun yüksək səviyyədə oımasını  məktəb rəhbərliyi daim düqqət mərkəzində saxlayır. Sevindirici haldır ki, valideynlərin dəstəyini hər zaman  hiss edirlər.     Məktəbin Lənkəran Dövlət Unuversiteti ilə əlaqələrinin genişlənməsi, müəllimlərin İKT-dən istifadə imkanlarının artırılması, onların sistemli olaraq təlimlərə cəlb edilməsi, pedaqoji kollektiv üzvlərinin əsasən təcrübəli, eləcə də gənclərdən ibarət olması da təhsil ocağının fəaliyyətinə müsbət təsir göstərən amillərdəndir.                                                      

Aslan İbrahimov sevindirici hal kimi onu da vurğuladı ki, hər il məktəbə gələn şagirdlərin sayı artmaqdadır. Bu proses 20 ildir ki, davam edir. 2014 cü ildə məktəbdə 319 şagird oxudugu halda, hal-hazırda 510 şagird məktəbdə təhsilini davam etdirir.       Məktəbin yeni binası 2014-cü ildə istifadəyə verilib. Yeni bina, yeni şərait, yeni uğurlara yol açır.

Görüşün sonunda Aslan İbrahimov professor Əjdər Ağayevə və jurnalist Böyükağa Mikayıllıya pedaqoji kollektivin görüşünə gəldikləri, maraqlı çıxışları üçün minnətdarılığı bildirdi.

Təhsil Şurasının Mətbuat və İctimaiyyətlə Əlaqə Mərkəzi