Qələbəyə, gələcəyə inam əzmi

 Şagirdlərin təlimə marağının təmin olunmasının əsasında dayanan ən mühüm amillərdən

biri müəllimin şəxsiyyəti, şəxsi-mənəvi keyfiyyətləridir. Müəllimin şəxsi keyfiyyətləri ilə elmi-təfəkkürü, dünyagörüşünün vəhdətindən yaranan mühitdə hərtərəfli vətəndaş hazırlığına malik şəxsiyyətin yetişməsi labüddür. İsmayıllı şəhər 6 nömrəli tam orta məktəbin Çağırışaqədərki Hərbi Hazırlıq müəllimi Əsgər Manafovu müəllimlikdən öncə yüksək mənəvi keyfiyyətlərə, vətənpərvərlik hisslərinə malik olan insan kimi tanımışam.  Bu ilin mart
ayında Təhsil Şurasının keçirdiyi “Qarabağ həqiqətlərinin böyüyən nəslə çatdırılmasının elmi-metodiki və praktik məsələləri” mövzusunda elmi-təcrübi konfransa respublikanın bir sıra qabaqcıl müəllimləri kimi Əsgər Manafov da qatılmışdı. Konfransdan əvvəl Əsgər müəllimin hansı mövzuda çıxış edəcəyi ilə maraqlandım. O, “Şuşa şəhərinin xanlıq mərkəzi kimi yaradılması və inkişafı” mövzusunda məruzə hazırladığını bildirdi. Söylədi ki, Qarabağın şah damarı olan Şuşanın tarixinin gənclərimizə öyrədilməsi bu gün müəllimlərin qarşısında dayanan mühüm vəzifələrdəndir. Əgər bu işə mən də öz töhfəmi verə bilərəmsə, vəzifəmin öhdəsindən az da olsa gəlmiş olaram. Əsgər müəllim  konfransdakı geniş, məzmunlu çıxışında Şuşanın tarixi ilə bağlı maraqlı faktlar səsləndirdi, Şuşada doğulmuş, bu şəhərin ədəbi, içtimai, mədəni mühitində formalaşmış görkəmli şəxsiyyətlərin adlarını bir-bir sadalaması konfrans iştirakçılarının diqqətini cəlb etdi. Bu çıxış bir müəllimin vətənpərvərlik hisslərinin ifadəsi idi. O, hər bir cümləyə, ifadəyə, fakta, tarixi hadisəyə incəliklə yanaşmış, mövzu üzərində sanki Şuşa şəhərinin tədqiqatçısı kimi çalışmışdı. Elə bu çıxışı ilə də təsəvvürümdə Əsgər Manafovun vətənsevər müəllim obrazı yarandı və onu daha yaxından tanımaq üçün dərslərini izləməyi qərara aldım. Məktəbdə olarkən eşitdim ki, bir gün əvvəl 6 nömrəli tam orta məktəbin “Şahin” hərbi idman komandası rayonun 46 məktəbi arasında birinci yerə layiq görülüb. Bir neçə il əvvəl isə o, yetirmələri ilə birgə bu mötəbər yarışın qalibi olub. Təcrübəli müəllimin dərsində Təhsil Şurasının sədri, pedaqoji elmlər doktoru, professor Əjdər Ağayevlə birgə iştirak etdik.

10-cu sinifdə komandir raport verdikdən sonra dərs başlandı.

Müəllim keçəcəyi mövzunun adını şagirdlərindən almaq üçün slaydlarda şirkət rəhbəri, şirkət adı nümayiş etdirdi. Şagirdlər “Patron” cavabını verməklə dərsin adını müəyyənləşdirdilər. Müəllim şagirdlərə paylama materialları təqdim etdi. Şagirdlər paylama materialları üzərində çalışmağa başladılar. Bu materiallarda şagirdlərə  patronun quruluşu, güllənin növləri, döyüş patronu, giliz, barıt atımı, kapsul və s. haqqında təqdimat hazırlamaq tapşırıldı. Paylama materiallarının təqdimatından sonra sinif “Qarabağ”, “Mübariz”, “Şahin”, “Vətən” adlandırılmaqla dörd qrupa bölündü. Tədqiqat aparmaq üçün “Mübariz” qrupuna “Patronun quruluşu hansılardır?”, “Şahin” qrupuna “İzburaxan” patronlar nə vaxt istehsal olunub?”, “Qarabag” qrupuna “Xüsusi məqsədlə olan patronlar hansılardır?”, “Vətən” qrupuna “Patronun növləri hansılardır?” tədqiqat sualları ünvanlandı. Şagirdlər bu tədqiqat sualları ətrafında işləməklə patronların növləri, onların göstəriciləri, avtomat darağının işləmə prinsipləri və s. haqqında suallar ətrafında düşündülər. Qrupların təqdimatı zamanı bəlli oldu ki, müəllimin qoyduğu qrup sualları arasında  Azərbaycan telekanallarında nümayiş olunan hərbi verilişlər, Azərbaycanla sudan və qurudan həmsərhəd olan dövlətlər, Dağlıq Qarabağla bağlı BMT Təhlükəsizlik Şurasının qəbul etdiyi qətnamələr haqqında da suallar da var idi. Əsgər müəllim şagirdlərini hərbi biliklərlə silahlandırmaqla yanaşı, onların dünyagörüşünün inkişafına, cəmiyyətdə baş verən ictimai-siyasi proseslərdən xəbərdar olmalarına da çalışırdı. Uşaqların da cavablarından aydın olurdu ki, onlar qoyulmuş sualların ictimai əhəmiyyətindən də xəbərdardırlar. Müəllim əgər BMT qətnamələri haqqında sual ünvanlayırdısa, daha sonra qətnamənin nə olduğu barədə sual edirdi. Azərbaycanın sərhəd qonşuları barədə sual verirdisə, həmin qonşuların coğrafi, strateji mövqeyi, Azərbaycanla əlaqələri barədə soruşur, dərsi inteqrasiya şəraitində aparırdı. Əgər bir hərbçi hansı hərbi-texniki, taktiki hazırlığa mailk olmalıdırsa, bunu Əsgər müəllimin simasında görmək mümkün idi.

Qruplar öz işlərini təqdim etdikdən sonra müəllimin siniflə apardığı sorğu-sual da şagirdlərin maraqlı cavabları ilə zənginləşdirildi. Bu, həm də mövzunun daha dərindən mənimsədilməsi məqsədi daşıyır, məntiqi mahiyyəti ilə şagirdlərin təfəkkür qabiliyyətlərinin inkişafına xidmət edirdi.

Əsgər müəllimin dərsdə qarşısına qoyduğu ən ali məqam şagirdlərinin hərbi biliklərin ilkin sirlərinə yiyələnmələri ilə bərabər, onlarda vətənpərvərlik hisslərini formalaşdırmağa nail olmaq idi. Onun izahatlarından aydın olurdu ki, silah, sürsat, hərbi texnika insanı məhv etmək üçün deyil, vətəni yağı düşməndən qorumaq üçündür. Hər bir Azərbaycan gənci Vətəninin, ata-babalarından miras qalmış müqəddəs torpaqlarının müdafiəsi naminə hərbi biliklərə yiyələnməli, silahdan istifadə qaydalarını bilməlidir.

Krossvordların həlli də dərsin maraqlı məqamlarından birinə çevrildi.  Əsgər müəllim bu məqamda da şagirdlərin dünyagörüşünü, digər fənlərdən əldə etdikləri bilik və bacarıqları da sınağa çəkdi. İnsafən, şagirdlər bu sınaqdan da üzüağ çıxdılar. Onlar qoyulmuş sualların məzmunu əsnasında Azərbaycanın, onun ayrılmaz hissəsi olan Qarabağın keçmişinə səyahət edir, Azərbaycanın hərb tarixində misilsiz rol oynamış hərbçilərlə, onların keçdiyi ömür yolunun bəzi məqamları ilə tanış olur, Azərbaycanla dost ölkələri tanıyır, ölkəmizin strateji mövqeyini öyrənirdilər. Şagirdlərin cavablarından bəlli oldu ki, Pakistan Azərbaycanın müstəqilliyini tanıyan ilk dövlət olub. Bu dövlət bu gün də ölkəmizin beynəlxalq aləmdə ən yaxın tərəfdaşı kimi çıxış edir.

Əsgər Manafovun 11-ci sinifdə apardığı dərs də fəal təlim texnologiyalarının tətbiqi şəraitində keçdi. Dərsin əvvəlində müəllim yazıçı Əhmədağa Qurbanovun “Tikanlı məftillər” povesti əsasında çəkilmiş “Dağlarda döyüş” filmindən fraqment nümayiş etdirdi. Fraqment nümayiş olunandan sonra şagirdlər mövzunun adını müəyyənləşdirdilər: “Saatdar”. Bundan sonra müəllim şagirdlərə paylama materialları təqdim etdi. Bu materiallarda qoyulmuş sullarla müəllim şagirdlərin hərbin vacib elementləri olan qarovulun vəzifələri, postun əhəmiyyəti, saatdarın kimliyi, vəzifələri və s. haqqında biliklər əldə etmələrinə nail oldu.

Qeyd edim ki, Əsgər müəllim şagirdlərinin silahla davranmalarına, ondan istifadə qaydalarına yiyələnmələrinə tədris etdiyi fənnin mühüm məqamı kimi yanaşır. Qanun çərçivəsində  şagirdlərinin silahla əyani tanışlığına nail olur.

Ümumiyyətlə, hər bir müəllim tədris etdiyi fənnin imkanlarından istifadə etməklə, şagirdlərinə vətəndaşlıq, özünüdərketmə hissləri, Vətən, millət, ata-ana sevgisi aşılamaq imkanlarına malikdir. Əsgər Manafovun hərbin tarixi və müasir inkişaf dinamikasını bilməsi, dərs prosesində hərb tarixi ilə  müasirliyi əlaqələndirə bilmə bacarığı və bunları pedaqoji ustalıqla tətbiq etməsi  şagirdlərin mövzunu dərketmə səviyyəsini yüksəldirdi. Sualların hazırlanması və qoyuluşundakı məntiqi ardıcıllıq, ideyalılıq, suallara maraq oyatmaq bacarığı dərsin elmi səviyyəsini yüksəltməklə bərabər, dərketməni də optimallaşıdırırdı. “Nəsimi” filmindən nümayiş olunan fraqmet qoyulan sualların daha asanlıqla qavranılmasına yönəlmişdi. Fraqmentdə döyüşçü ona həvalə olunmuş postu icazəsiz tərk etdiyi üçün tənbeh olunurdu. Əsgər müəllim bu kimi faktlardan istifadə etməklə, şagirdlərə aşılayırdı ki, onlara tapşırılan, həvalə olunan işlərə məsuliyyətlə yanaşmalıdırlar. Kiçik bir məsuliyyətsizlik arzuolunmaz nəticələrə gətirib çıxara bilər. Bunun üçün də hələ kiçik yaşlarından məktəblilərə məsuliyyət hissi aşılanmalı, hər kəs öz borcunu dərk etməlidir. Vətən hər şeydən öndədir.

“Mübariz”, “Vətən”, “Qarabağ”, “Şahin” qruplarına ünvanlanmış sullarda da müəllim sulların yalnız mexaniki olaraq cavablandırılmasına deyil, məntiqin və tədqiqatın nəticəsi kimi meydana çıxmasına çalışırdı. Bir məqama da diqqət yetirmək lazımdır ki, Əsgər müəllim şagirdlərinin tədris etdiyi fənnə maraqlarını təmin etməklə bərabər, onların gələcək əsgərlik həyatına, Vətənin müdafiəsinə hazırlığına çalışırdı. Sinfin qızları da verilən suallara oğlanlarla bərabər cavab verir, hərbə ciddi maraq göstərdiklərini nümayiş etdirirdilər. Dərsin sonunda şagirdlərin bir-birilərini qiymətləndirməsləi də maraq doğurdu.  

Əsgər Manafovun pedaqoji fəaliyyətinə nəzər saldıqda görmək mümkündür ki, onun sinif otağında yetirmələri ilə birgə çəkdiyi zəhmət yarış meydanlarında qələbələrin əldə olunmasına yol açır. Böyük sərkərdələrdən birinin dediyi kimi, təlimdə tər tökməyən, döyüşdə qan tökər. Artıq neçə illərdir ki, Əsgər Manafovun hazırlayıb respublika yarışlarına çıxardığı hərbi idman komandaları rəqibləri üçün keçilməz səddə çevrilib. Hər bir qələbə, hər bir uğur gənclərin fiziki hazırlığı ilə yanaşı, onların mükəmməl mənəvi hazırlığından da soraq verir. Fikrimcə, Əsgər Manafovun uğurlarının təməlində dayanan amillərdən biri də məhz budur: Qələbəyə, gələcəyə  inam əzmi, hərbin sirlərinə yiyələnmək sevgisi. Şübhə yoxdur ki, Əsgər Manafovun 70-ə yaxın yetirməsinin zabit kimi şərəfli peşəyə yiyələnib Vətənin müdafiəsində dayanması da bu sevgidən qaynaqlanır. 

Professor Əjdər Ağayev: “Bu gün gənclərin çağırışaqədərki hərbi hazırlıq fənnindən öyrəndikləri onların gələcək hərbi xidmət həyatında mühüm köməkçisi olacaqdır. Biz Əsgər Manafovun dərsində müəllimin nəzəri vətəndaş bilikləri ilə yanaşı, hərbi bilikləri də mükəmməl şəkildə aşılandığının şahidi olduq. Əsgər müəllimin simasında hərbin sirlərindən xəbərdar olan mütəxəssis və əsl pedaqoqu gördük.”

Qalib Bəşirov: “Əsgər müəllimin şagirdləri ilə birlikdə əldə etdiyi respublika miqyaslı uğurlar yalnız 6 nömrəli tam orta məktəbin deyil, İsmayıllı təhsilinin adına yazılan uğurlardır.”       

Əsgər Manafovun ömür yolundan sətirlər...

      Ehtiyatda olan zabit Əsgər Manafov 1957-ci ildə  Bakı şəhərində neftçi ailəsində anadan olub.
1989-cü ildə  Moskva şəhərində Şvernik  adına  Həmkarlar  Hərəkatının Ali məktəbinin  iqtisadiyyat fakültəsini bitirib.

1988-cı ildən  İsmayıllı rayon 138 nömrəli texniki  peşə məktəbində pedaqoji  fəaliyyətə başlayıb.

1992-1998-ci   illərdə İsmayıllı şəhər 3 və 4 nömrəli tam orta  məktəblərdə   Gənclərin Çağırışaqədərki Hazırlıq fənn müəllimi işləyib. 1998-ci  ildən  Natiq  Behdiyev  adına İsmayıllı şəhər 6 nömrəli tam  orta  məktəbdə bu fənni tədris edir. 1998-ci ildə   qabaqcıl   iş   təcrübəsi  İsmayıllı  Rayon   Təhsil  şöbəsi tərəfindən öyrənilərək yayılıb.

2004-cü ildə Təhsil Nazirliyi tərəfindən keçirilmiş “İlin ən yaxşı müəllimi” müsabiqəsində II dərəcəli diploma layiq görülüb.

2008-ci ildə şagirdi “Cəsurlar ” hərbi idman yarışında fərqləndiyinə  görə Müdafiə Nazirliyinin “Fəxri Fərman”ı  ilə təltif olunub.

 Hazırladığı “Vətənin Müdafiəsinə Hazıram” komandası Respublika çempionatının yekun mərhələsində    2008-ci ildə I,  2009-cu ildə II yerə layiq görülüb.

2009- ci ildə hazırladığı "Şahin" hərbi-idman komandasi  final yarışında qalib gələrək  ölkə çempionu olub.

2011-ci ildə "Qarabağ uğrunda qələbəyə doğru" şüarı altında keçirilən güllə atıcılğı yarışında komandası  respublikanın final  yarışında  I yeri qazanıb.

2012-ci ildə yaz çağrışına həsr olunmuş yarışda “Vətənin Müdafiəsinə Hazıram” komandası Respublika çempionatının qalibi olub. 2012-ci ildə “Gənc xilasedici  və yanğınsöndürən” komandası   Respublika   final yarışında II  yeri tutub .

2013-cü ildə “Gənc xilasedici  və yanğınsöndürən” komandası Zona yarışında I, Respublika   final  yarışında II olub.

Təcrübəli hərbçi-müəllim  “Gənc döyüşçünün məharətlənmə hazırlığı”, “Öyrəndik ki, öyrədək”, “Vətən çağırır”, “İqtisadi biliklər zamanın tələbidir” adlı kitabların müəllifidir.

Əsgər Manafovun yetirmələrindən 64 nəfəri  ali hərbi məktəbi bitirərək  zabit kimi vətənə xidmət edirlər.

 O, Gənclərin  Çağırışaqədərki   Hazırlıq  fənni  üzrə  dayaq məntəqəsinin rəhbəri, Azərbaycan   Respublikası   Silahlı    Qüvvələrinin ehtiyyatda olan zabitlərinin Şirvan regionu üzrə sədr müavinidir. 

Azərbaycan  Respublikası Müəllimlər Qurultayının nümayəndəsi olmuşdur.  

Əsgər Manafov 2011-ci ildə Azərbaycan Respublikasının Prezidenti cənab İlham Əliyevin sərəncamı ilə keçirilən “Ən yaxşı müəllim” müsabiqəsinin  qalibi olub, 2012- ci ildə “Azərbaycan Respublikasının Qabaqcıl Təhsil  işçisi” adına layiq görülüb. 2013-cü ildə Azərbaycan Respublikasının prezidenti cənab İlham Əliyevin  sərəncamına əsasən "Tərəqqi" medalı ilə təltif olunub, eyni zamanda ölkə başçısı tərəfindən “Təşəkkürnamə” ilə mükafatlandırılıb.

Böyükağa MİKAYILLIКонец формы